F-1.az xatırladır ki, dünən baş tutan sərbəst yürüşlərdə Bottas və Həmilton hamıdan sürətli olmuşdular. Lyuis bu gün də fərqlənib – hər 3 sessiyasında Mercedes sürücüləri ilk iki yerin sahibi olublar.
Pirelli bu dəfə orta üçlüyü – C2, C3 və C4 tərkiblərini gətirib. Soft təkərlər rolunu oynayan C4 tərkibindən komandalar sərbəst yürüşlərdə geniş istifadə ediblər – onların yarışda səmərəli olacağı gözlənilmir və hamı məhdud sayda olan digər iki tərkibi qorumaq üçün bu addımı atıb.
İlk Sessiyada Qrojan, Rassell və Maqnussen Medium, digərləri isə Soft təkərlərlə mübarizəyə başlayıblar. Okon Rasseli bloklayıb – stüardlar sessiyadan sonra Estebana startda 3 yer itirmə cəzası və 1 cərimə balı veriblər. Ən yaxşı dövrəni Bottas vurub – 1:26.738. Tras hüdudlarını pozduğu üçün nəticəsi silinən Kvyatla yanaşı, Rəykkönen, Covinatsi, Latifi və Maqnussen mübarizəni dayandırıblar.
İkinci sessiyada Ferstappen Hard, digərləri isə Medium təkərlərlə trasa çıxıblar. Birinci cəhdini qaçıran Rassell ikinci cəhdinə Soft təkərlə çıxsa da, ilk onluğa düşə bilməyib. Eyni aqibəti Fettel də yaşayıb – Ferrari bolidi dördqat dünya çempionuna hətta Soft təkərlərlə belə, üçüncü sessiyaya keçmək imkanı verməyib. Onlarla yanaşı, Qrojan , Sayns və Okonun da mübarizəni dayandırdığı sessiyada protokollara 1:25-785-lik nəticə ilə Bottas başçılıq edib.
Son sessiyada Rikkardo, Elbon və Ferstappen Medium, digər 7 sürücü isə Soft təkərlərlə boksları tərk ediblər. Həmilton komanda yoldaşını üstələyib. İkinci cəhdə Mercedes sürücüləri və Rikkardo Medium təkərlərlə çıxıblar. Əvvəlki 3 yarışda poul uğrunda mübarizədə Lyuisə boyun əyən Valtteri bu gedişə son verib – 1:25.154.
Beləliklə, Valtteri Bottas cari mövsümdə ikinci, karyerasında isə 13-cü poulunu əldə edib. Sabah ilk cərgəni Mercedes sürücüləri zəbt edəcək. Koronavirus testinin cavabı müsbət olan Peresi əvəzləyən Hülkenberq və Ferstappen yarışa ikinci cərgədən başlayacaqlar. Üçüncü cərgə isə Rikkardo və Strollundur.
Yubiley Qran Prisi sabah Bakı vaxtı ilə 17:10-da start götürəcək…
| Yer | N | Sürücü | Komanda | 1-ci sessiya | 2-ci sessiya | 3-cü sessiya | |||||
| Yer | Zaman | Dövrə | Yer | Zaman | Dövrə | Zaman | Dövrə | ||||
| 1 | 77 | Valtteri Bottas | Mercedes AMG | 1 | 1:26.738 | 8 | 1 | 1:25.785 | 6 | 1:25.154 | 6 |
| 2 | 44 | Lyuis Həmilton | Mercedes AMG | 2 | 1:26.818 | 8 | 3 | 1:26.266 | 6 | 1:25.217 | 6 |
| 3 | 27 | Niko Hülkenberq | Racing Point | 9 | 1:27.279 | 6 | 2 | 1:26.261 | 6 | 1:26.082 | 6 |
| 4 | 33 | Maks Ferstappen | Red Bull | 4 | 1:27.154 | 3 | 9 | 1:26.779 | 3 | 1:26.176 | 6 |
| 5 | 3 | Daniel Rikkardo | Renault | 11 | 1:27.442 | 5 | 5 | 1:26.636 | 3 | 1:26.297 | 6 |
| 6 | 18 | Ləns Stroll | Racing Point | 6 | 1:27.187 | 6 | 7 | 1:26.674 | 6 | 1:26.428 | 6 |
| 7 | 10 | Pyer Qasli | AlphaTauri | 5 | 1:27.154 | 6 | 4 | 1:26.523 | 6 | 1:26.534 | 6 |
| 8 | 16 | Şarl Lekler | Ferrari | 10 | 1:27.427 | 5 | 8 | 1:26.709 | 5 | 1:26.614 | 6 |
| 9 | 23 | Aleksander Elbon | Red Bull | 3 | 1:27.153 | 6 | 6 | 1:26.642 | 6 | 1:26.669 | 6 |
| 10 | 4 | Lando Norris | McLaren | 7 | 1:27.217 | 6 | 10 | 1:26.885 | 6 | 1:26.778 | 6 |
| 11 | 31 | Esteban Okon | Renault | 8 | 1:27.278 | 6 | 11 | 1:27.011 | 6 | ||
| 12 | 5 | Sebastyan Fettel | Ferrari | 14 | 1:27.612 | 8 | 12 | 1:27.078 | 6 | ||
| 13 | 55 | Karlos Sayns | McLaren | 12 | 1:27.450 | 6 | 13 | 1:27.083 | 6 | ||
| 14 | 8 | Roman Qrojan | Haas | 13 | 1:27.519 | 9 | 14 | 1:27.254 | 7 | ||
| 15 | 63 | Corc Rassell | Williams | 15 | 1:27.757 | 8 | 15 | 1:27.455 | 3 | ||
| 16 | 26 | Daniil Kvyat | AlphaTauri | 16 | 1:27.882 | 6 | |||||
| 17 | 20 | Kevin Maqnussen | Haas | 17 | 1:28.236 | 9 | |||||
| 18 | 6 | Nikolas Latifi | Williams | 18 | 1:28.430 | 6 | |||||
| 19 | 99 | Antonio Covinatsi | Alfa Romeo | 19 | 1:28.433 | 6 | |||||
| 20 | 7 | Kimi Rəykkönen | Alfa Romeo | 20 | 1:28.493 | 6 | |||||
