F-1.az daha əvvəl də xəbər vermişdi ki, Ferrari-nin saytında 5 gün davam edəcək gerisayım başladılıb. Gerisayım bitdikdən sonra italyanların 2016-cı il mövsümü üçün hazırladıqları bolidin adının açıqlanacağı iddia edilir.
İtalyan mətbuatının verdiyi xəbərlərə əsasən, Ferrari-nin ön asılqanı tamamilə yenilənib. Autosprint nəşrinin verdiyi xəbərdə deyilir ki, bolidin arxa tərəfi ensiz olacaq. Jurnal bundan başqa yazır ki, Ferrari-nin mühəndisləri Toro Rosso-nun tərzində burun elementi dizayn ediblər.
Pol Rikarda keçiriləcək yağış təkər testlərində italyanlardan hansı pilotun çıxış edəcəyi hələ də rəsmən dəqiqləşməyib. Tiffozilərin pilotu Kimi Rəykkönen yeni ildən əvvəl verdiyi müsahibədə demişdi ki, “inanmıram ki, yanvar ayında test edək, yaxşı ki, Esteban Qutyerres var…”
