Quru. Havanın temperaturu +29° C, trasın temperaturu +29° C

Mövsümün son yarışından əvvəl dörd sürücü titula namizəd idi. Fernando Alonso Mark Uebberi cəmi 8 xal qabaqlayırdı, avstraliyalı sürücü isə komanda yoldaşı Sebastyan Fetteldən 7 xal, Lyuis Həmiltondan isə 15 xal üstün idi. Şənbə günü sıralanma turu vəziyyəti bir qədər bərabərləşdirib – Fettel poul qazanıb, Həmilton ikinci, Alonso üçüncü, Uebber isə beşinci olub.

İkiqat dünya çempionundan başqa heç bir namizəd vəziyyətə nəzarət edə bilmirdi, titulun taleyi rəqiblərin çıxışından asılı idi, əgər yarış sıralanma turu kimi qurtarsaydı, Alonso üçqat dünya çempionu olardı.

Startda Fettel liderliyini qoruyub saxlayıb, Batton Alonsonu qabaqlayıb. Şumaher yerində fırlanıb və Liutsi tam sürətlə ona çırpılıb – qəza ciddi alınıb, trasa Təhlükəsizlik Maşını (TM) çıxıb. Petrov, Rosberq, Algersuari, Senna, di Qrassi və Klin boksa yönəliblər, altı dövrədən sonra restart elan olunub.

Restartdan dərhal sonra Rosberq və Petrov Qloku keçiblər, 11-ci döngədə Kubitsa Sutili keçib, liderlərin mövqeyində dəyişiklik olmayıb.

12-ci dövrədə Uebber pit-stopa baş çəkib, bərk təkərlərlə trasa qayıdan avstraliyalı sürücü 16-cı yerə düşüb. 14-cü dövrədə Massa, daha iki dövrə sonra isə Alonso da bərk təkərlərə keçiblər. Çempionatın lideri trasa Uebberin qarşısında qayıda bilib, Massa isə avstraliyalı sürücüdən geri düşüb. Bütün bu qrup 11-ci yerdə gedən Petrovla fərqi azaltmağa başlayıb. Peletonun önündə isə Fettel, Həmilton və Batton Kobayaşi və Kubitsadan uzaqlaşmağa başlayıblar.

Alonso Petrovu keçmək üçün bir neçə cəhd edib, 23-cü dövrədə ispaniyalı sürücü hətta şikananı kəsməli olub. 24-cü dövrədə isə liderlərin pit-stopu başlayıb – əvvəl Həmilton, bir dövrə sonra isə Fettel mexaniklərin qonağı olublar – britaniyalı sürücü pitdən sonra Kobayaşini keçsə də Kubitsanı uzun müddət keçə bilməyib.

40-cı dövrədə Batton boksa getdikdən sonra Fettel liderliyi özünə qaytarıb, britaniyalı sonuncu çempion isə trasa komanda yoldaşının arxasında qayıdıb.

44-cü dövrədə Timo Qlokun maşını trasda dayanıb, Kubitsa isə planlı pit-stopdan sonra trasa altıncı qayıdıb. Titulun əldən getdiyini başa düşən Alonso Petrovu keçmək üçün daha bir neçə hücum edib. Rusiyalı sürücü isə heç bir səhvə yol verməyib.

Sebastyan Fettel inamlı qələbə qazanıb, bu qələbəsi sayəsində alman sürücü tarixin ən gənc çempionu olub – Red Bull mövsümü hər iki çempionatda birinci başa vurub! McLaren sürücüləri podium qazanmaqla Mühəndislər Kubokunda komandanın ikinci yerini qoruyublar.

Mövsüm çox maraqlı alınıb, amma qış tez keçəcək – gələn il martın 13-də yeni çempionat başlayacaq, az qalıb…

Sürətli dövrə: Lyuis Həmilton (McLaren) – 1:41.274 (47-ci dövrə).

Turnir cədvəli:

Quru. Günəşli. Havanın temperaturu +24° C, trasın temperaturu +52° C

Dünən sıralanma turu yağışlı havada keçdiyi üçün gözlənilməz alınmışdı – Niko Hülkenberq qurumaqda olan trasda Williams-ın sükanı arxasında ilk poulunu qazanmışdı. Hava proqnozu əvvəldən şənbə gününə yağış vəd eləmişdi, amma bazar günü havanın günəşli olması gözlənilirdi.

Trasa çıxarkən Kristian Klinin maşınında yanancaq sistemində təzyi aşağı düşüb, sürücü boksa qayıdıb və pit-leyndən start almalı olub.

Startda Fettel Hülkenberqi keçib, bir qədər sonra Uebber də gənc alman sürücünü qabaqlayıb. Petrov trasdan kənara çıxıb və sonuncu yerə düşüb, Həmilton dördüncü döngədə səhvə yol verib və Alonso onu keçib. Red Bull sürücüləri uzaqlaşmağa başlayıblar, Hülkenberq isə Alonso və Həmiltonu ləngidib.

Petrov yeni komandaların sürücüləri keçərək 18-ci yerə yüksəlib. 12-ci dövrədə Batton pit-stop keçirib, bərk təkərlərlə trasa qayıdıb, bir dövrə sonra Massa pitə baş çəkib və Censonun önündə trasa qayıdıb, amma britaniyalı sürücü tezliklə onu qabaqlayıb. Barrikello pit-stopda problemlərlə üzləşib, Massa isə bir dövrədən sonra pitə qayıdıb və mexaniklərdən sağ qabaq təkəri bərkitməyi xahiş edib.

15-ci dövrədə Hülkenberq, Kubitsa və Haydfeld, 20-ci dövrədə Petrov, 21-ci dövrədə Həmilton və Şumaher pit-stop keçiriblər. Lyuis trasa Censonun önündə qayıdıb. 25-ci dövrədə Alonso pit-stop keçirib və trasa üçüncü qayıdıb. Növbəti dövrədə Fettel, daha sonra isə Uebber boksa giriblər, liderlərin mövqeləri dəyişməyib. Vəziyyət stabilləşib – Fettel Uebberi 2 saniyə, Mark isə Alonsonu 10 saniyə qabaqlayıb.

35-ci dövrədə Barrikello və Algersuari birinci döngədə toqquşublar və Rubens boksa getməli olub, 43-cü dövrədə Qrassi maşını boksda dayandırıb.

51-ci dövrədə Liutsi ciddi qəzaya uğrayıb, Təhlükəsizlik Maşını (TM) trasa çıxıb. Sutil, Massa, Petrov, Barrikello, Haydfeld, Həmilton, Rosberq, Klin və Batton boksa tələsiblər, amma bir neçə dövrədə sonra Rosberq yenidən boksa baş çəkib.

Restartdan sonra vəziyyət dəyişməyib. 60-cı dövrədə Massa və Buemi toqquşublar, amma hər iki sürücü mübarizəni davam etdiriblər.

Fettel yarışı inamla birinci yerdə başa vurub, Uebber isə ikinci yeri tutmaqla Red Bull-a Mühəndislər Kubokunda ilk qələbəsini qazandırıb. Alonso isə finişdə üçüncü olub – titulun taleyi mövsümün son yarışında həll olunacaq!

Sürətli dövrə: Lyuis Həmilton (McLaren) – 1:13.851 (66-cı dövrə).

Turnir cədvəli:

Yağış. Havanın temperaturu +18° C, trasın temperaturu +19° C

Bütün gecəni və səhəri Koreya trasını yağış yuyub, sonra hava yaxşılaşıb, amma asfalt gec quruyub və sürücülər start düzlüyünə yağış təkərlərdə çıxıblar. Adrian Sutil az qala trasdan çıxıb, Timo Qlok yerində fırlanıb, Bruno Senna otluğa çıxıb. Asfaltdan kənarda vəziyyət lap pis olub – qum və gil su ilə qarışaraq trasa axmağa başlayıb.

Starta 10 dəqiqə qalmış yenidən yağış başlayıb, komandaların nümayəndələri FİA ilə Təhlükəsizlik Maşınının (TM) arxasında startı müzakirə etməyə başlayıblar – yağış altında asfaltın nə dərəcədə sürüşkən olması heç kimə bəlli deyildi. Start 10 dəqiqə təxirə salınıb, daha sonra komandalara bildirilib ki, start TM-in arxasında olacaq və komandalar güclü yağış təkərindən istifadə etməlidirlər.

Startdan 3 dövrə sonra yarış qırmızı bayraqlarla dayandırılıb – hamı vəziyyətin yaxşılaşmasını gözləyib. Restart yerli vaxtla 16:05-ə təyin edilib – amma yenə də TM-in arxasında.

Restartdan sonra Sakon Yamamoto trasdan çıxıb, Mixael Şumaher isə üçüncü döngədə yerində fırlanıb – amma hər iki sürücü peletona qayıda biliblər. Yağış zəifləyib və 15 dövrədən sonra TM trası tərk edib. Dərhal Mercedes GP sürücüləri fərqləniblər – Rosberq Həmiltonu, Şumaher isə Kubitsanı keçiblər, amma növbəti dövrədə Mark Uebber səhvə yol verib, trasdan çıxıb, qoruyucu baryerlərə çırpılan maşın trasa qayıdıb və Rosberqi də baryerlərə çırpıb. Hər iki sürücü yarışı dayandırıb və trasa TM çıxıb.

24-cü dövrədə restart elan olunub. Senna və Trulli toqquşublar, Yarno boksda mübarizəni dayandırıb. Daha 3 dövrə sonra Lukas di Qrassi qəzaya uğrayıb. Vitaliy Petrov birinci olaraq keçid təkərlərə keçib, ondan sonra Batton və Sutil, 31-ci dövrədə isə Hülkenberq eyni addımı atıblar. 32-ci dövrədə Buemi və Qlok toqquşublar və TM yenidən trasa çıxıb. Sürücülərin hamısı pit-stopa tələsib, boksda ləngiyən Alonso trasa Həmiltonun arxasında qayıdıb.

Amma restartdan dərhal sonra Həmilton səhvə yol verib və Alonso mövqeyini geri qaytarıb. 41-ci dövrədə Petrov qəzaya uğrayıb, 5 dövrə sonra isə yarışın lideri Fettelin maşınında motor yanıb – Sebastyan yanğınsöndürəndən istifadə etməli olub. 47-ci dövrədə Sutil Kobayaşini keçmək istərkən kiçik təmasdan sonra trasdan çıxıb və yarışı dayandırıb.

Finişə yaxın trayektoriya quruyub, cod asfalt keçid təkərlərini yeyib və sürət çox aşağı düşüb. Finiş artıq qaranlığa yaxın olub. Fernando Alonso mövsümdə beşinci qələbəsini qazanaraq çempionatda liderliyi ələ keçirib – xaotik yarışda titula beş namizəddən üçü xal qazana bilməyib, titulun taleyi mövsümün son iki yarışında həll olunacaq…

Sürətli dövrə: Fernando Alonso (Ferrari) – 1:50.257 (42-ci dövrə).

Turnir cədvəli:

Quru. Günəşli. Havanın temperaturu +26° C, trasın temperaturu +32° C

Dünən yağış yağdığı üçün sıralanma turu bu gün səhərə keçirilmişdi, nahardan sonra isə sürücülər yarışın startına çıxmalı olublar. Boksdan çıxıb start-finiş düzlüyünə gedərkən Lukas di Qrassi döngəyə girə bilməyib və maşını qoruyucu baryerlərə çırpıb.

Startda Fettel poulun üstünlüyünü qoruyub saxlaya bilib, Kubitsa isə təmiz yerdən start aldığı üçün Uebberi qabaqlayıb, peletonun ortasında isə bir neçə qəza baş verib. Petrov yaxşı start alıb, Massanı keçib, Haydfeldi də keçərkən alman sürücü rusiyalı sürücünü sola tərəf sıxışdırıb, nəticədə Petrov Hülkenberqlə toqquşub. Bir neçə döngə sonra isə Massa Liutsi ilə toqquşub. Trasa Təhlükəsizlik Maşını çıxıb, Rosberq, Trulli, Qlok və Senna boksa yeni təkər dəsti ardınca üz tutublar. Bir neçə dövrədən sonra Kubitsa da dayanmalı olub – polşalı sürücünün Renault-sundan təkər ayrılıb.

Restartdan sonra Red Bull sürücüləri və Alonso peletondan aralanmağa başlayıblar, McLaren sürücüləri və Şumaher onları təqib ediblər.

Birinci pit-stopa kimi peletonda yalnız Kobayaşi fəal olub – əvvəlcə yaponiyalı sürücü sancaqda Algersuariyə hücum edib, maşınlar yüngül toqquşsa da Kamui rəqibini qabaqlaya bilib. İki dövrə sonra yaponiyalı sürücü həmin yerdə Sutili də uğurla keçə bilib.

Liderlərdən pit-stopa birinci Həmilton baş çəkib, 23-cü dövrədə Şumaher pit-stop keçirib və komanda yoldaşının arxasında trasa qayıdıb. Fettel və Alonso paralel pit-stop keçiriblər. Həmilton yeni təkər dəsti ilə bir-birinin ardınca sürətli dövrələrə imza atmaqla Kobayaşini də keçib.

25-ci dövrədə Uebber boksa getdikdən sonra yarışa Batton başçılıq edib. Bərk təkərlərlə start almış sonuncu dünya çempionu 13 dövrə trasda qalmaqla Fettel, Uebber, Alonso və Həmiltonu arxasına yığıb. 38-ci dövrədə Batton boksa gedən kimi Red Bull sürücüləri sürətləniblər. Censon isə trasa komanda yoldaşının arxasında qayıdıb. Amma tezliklə məlim olub ki, Lyuisin maşınına təzə qoyulmuş ötürmələr qutusunda (məhz buna görə də britaniyalı sürücü startda beş yer itirmişdi) problemlər əmələ gəlib. Ona görə də Batton bir neçə dövrədən sonra dördüncülüyə yüksəlib.

Bundan sonra isə yenə də Kobayaşi diqqət mərkəzinə çıxıb – Kamui təzə təkərlərlə əvəlcə Algersuarini yenə də sancaqda, amma bu dəfə xarici radiusla keçib. Elə bu zaman onun qarşısında olan Sutilin maşınında motor partlayıb və yaponiyalı sürücü onluğa daxil olub. Bir neçə dövrədən sonra Rosberq də qəzaya uğrayıb. Kamui isə gərgin mübarizədə Barrikellonu da üstələyib və komanda yoldaşı Haydfeldi keçərək yeddinci olub.

Finiş xəttini birinci Fettel keçib. Uebber ikinci olmaqla Red Bull-a mövsümdə üçüncü qələbə dublu qazandırıb. Alonso üçüncü olmaqla çempionatda ikinci yerini qoruyub, amma Fettel onunla bərabər xal toplayıb və onların hər ikisi Uebberə 14 xal uduzurlar. Bizi mövsümün maraqlı finişi gözləyir!

Sürətli dövrə: Mark Uebber (Red Bull) – 1:33.474 (53-cü dövrə).

Turnir cədvəli:

Quru. Havanın temperaturu +30° C, trasın temperaturu +30° C

Titula beş namizəd sıralanma turundan sonra ilk beş yeri tutmuşdu və hamı ilk növbədə finişə çatmağı başlıca məqsəd görürdü – mübarizəni yarımçıq dayandırmaq çempionluq şansına ciddi təsir edə bilərdi.

Startdan əvvəl məlum olub ki, Xayme Algersuarinin maşınında soyuducu maye axıb, ona görə də 11-ci yerdən start almalı olan gənc ispan sürücü yarışa pit-leyndən başlayıb. Titula namizəd olan sürücülər isə startdan sonra mövqelərini qoruyub saxlayıblar. Startda Barrikello iki yer itirib, Petrov isə Kobayaşini qabaqlayıb. Sonuncu yerdən start almış Massa birinci dövrənin sonunda pit-stopa qayıdıb və yumşaq təkərləri bərk təkərlərlə əvəzləyib.

İkinci dövrədə Haydfeldlə toqquşan Liutsi mübarizəni dayandırıb – Nik burun elementini dəyişib, Force İndia-nı evakuasiya etmək üçün isə trasa Təhlükəsizlik Maşını (TM) çıxıb. Uebber, Petrov, Buemi, Hülkenberq, Sutil, Kovalaynen, Trulli, Algersuari, Klin, di Qrassi və Senna boksa yönəliblər. Liderlərdən yalnız Mark təkərlərini dəyişib.

Restartdan sonra Uebber Qloku keçib, Hülkenberq Petrovu keçərkən rusiyalı sürücünü trasdan sıxışdırıb, fürsətdən istifadə edən Sutil hər iki sürücünü, Massa isə Petrovu keçib. Uebber 9-cu dövrədə Kobayaşini, daha iki dövrə sonra isə Şumaheri keçib. 15-ci dövrədə Sutil Qloku keçib – Qlok porebrikin üstünə çıxdığı üçün vaxt itirib və ardınca gələn bütün sürücülər onu keçiblər.

Alonso və Fettel cütlüyü üçüncü yerdə gedən Həmiltonu 24-cü dövrədə 22 saniyə qabaqlayıb. Beş dövrə sonra isə pit-stoplar başlayıb – Həmilton Uebberin arxasına düşüb, Alonso və Fettelin sinxron piti isə mövqelərini dəyişməyib. 30-cu dövrədə Batton, növbəti dövrədə isə Rosberq təzə təkər dəsti alıblar.

Bu zaman Kobayaşi Şumaherə hücum edib, maşınlar toqquşub, Mixael pitə yollanıb, Kamui isə bir dövrə sonra Sauber-ini baryerə çırpıb, arxadan gələn Senna isə ona çırpılıb – TM yenidən trasa çıxıb. Kubitsa və Barrikello dərhal pitə tələsiblər, Uebber üçüncülüyə yüksəlib.

Restartda Həmilton Uebberə hücum edib, maşınlar toqquşub və Lyuis mübarizədən kənar qalıb. Bir dövrə sonra Şumaher ikinci Sauber-i də mübarizədən kənarlaşdırıb – hər iki insidenti araşdıran stüardlar sürücüləri cərimə etməyiblər.

46-cı dövrədə arxa təkəri deşilmiş Kubitsa yenidən pitə baş çəkib – altıncı yerdə gedən polşalı sürücü trasa on üçüncü qayıdıb. Amma təzə təkərlər hesabına Robert bir-birinin ardınca Algersuarini, Buemini, Massanı, Petrovu, Hülkenberqi və Sutili keçə bilib və yeddinciliyə yüksəlib. Finişə bir dövrə qalmış Kovalaynenin Lotus-unda motor alovlanıb – finlandiyalı sürücü start-finiş düzlüyündə maşını saxlayıb, kokpitdən çıxıb, yaxınlıqdakı mexaniklərdən yanğınsöndürəni alıb və yanğını söndürə bilib.

Alonso və Fettel sonuncu döngəyə qədər mübarizə aparıblar, amma Fernando liderliyini qoruyub və mövsümdə 4-cü, karyerasında isə 25-ci qələbəsini qazanıb. İspaniyalı sürücü şənbə günü qazandığı poula bazar günü qələbə, sürətli dövrə və startdan finişədək liderlik əlavə etməklə böyük şlemə imza atıb.

Çempionatda mübarizə gərginləşir, hər şey mövsümün son dörd yarışında həll olunacaq…

Sürətli dövrə: Fernando Alonso (Ferrari) – 1:47.976 (58-ci dövrə).

Qeyd: * Adrian Sutil yekun nəticəsinə 20 saniyə əlavə edilməklə cərimə olunub.

* Niko Hülkenberq yekun nəticəsinə 20 saniyə əlavə edilməklə cərimə olunub.

Turnir cədvəli:

Quru. Günəşli. Havanın temperaturu +25° C, trasın temperaturu +36° C

Monsanın nadir xarakteri sıralanma turunda qüvvələr nisbətinə təsir edib, poulu Fernando Alonso qazanıb – 2008-ci ilin Braziliya Qran Prisindən sonra ilk dəfə Ferrari sürücüsü yarışa birinci yerdən başlayırdı. Çempionatın lideri beşinci mövqedən, ikinci yerdə olan Mark Uebber dördüncü mövqedən yarışa qatılırdı – ona görə də Monsa titula digər namizədlərə şans vermişdi.

İki sürücü cərimə almışdı – dünən sıralanma turunda 15-ci olmuş Vitaliy Petrov Timo Qloku bloka saldığı üçün 5 yer itirməklə cəzalandırılmışdı, alman sürücünün özü də ötürmələr qutusunu dəyişdiyi üçün eyni cəriməni almışdı. Startdan əvvəl məlum olub ki, Kamui Kobayaşinin maşınında ECU ilə problemlər yaşanıb, sürücü start xəttinə vaxtında çıxmadığı üçün pit-leyndən start almalı olub, amma heç birinci dövrəni tamamlaya bilməyib.

Startı isə Censon Batton qazanıb, Həmilton dördüncü mövqeyə yüksəlib, amma Massa ilə mübarizədə kiçik təmas nəticəsində MP4-25-in asılqanı sınıb və Lyuis trasdan kənara çıxıb. Uebber doqquzuncu yerə, Fettel yeddinci yerə düşüblər, Kubitsa beşinci, Petrov isə on beşinci yerə yüksəliblər.

İlk üçlük Rosberqdən uzaqlaşmağa başlayıb, sürücülər sürətli dövrələr göstərməkdə bir-birini əvəz ediblər. Artıq 13-cü dövrədə Bruno Senna maşını saxlamalı olub. Şikananı kəsdiyi üçün 20-ci dövrədə Algersuari pit-leyndən keçmək cəzası alıb, elə bu zaman pit-stop keçirən Yamamoto isə mexaniklə toqquşub – zədə almış mexanik tibb maşınında hospitala göndərilib.

21-ci dövrədə Fettel komandaya motor problemləri barədə xəbər verib və Uebberi irəli buraxıb, amma telemetriyanı izləyən mexaniklər problemin arxa əyləcdə olmasını görüblər. Tezliklə problemi aradan qaldıran sürücü yenidən sürətini artırıb.

34-cü dövrədə isə ilk onluqda gedən sürücülərin pit-stopları başlayıb – Kubitsa təkərlərini tez dəyişib, iki dövrə sonra Rosberq və Kubitsa pitə giriblər, 37-ci dövrədə isə Batton və Hülkenberq – Rosberq Kubitsanın önündə trasa qayıdıb, Mark isə Robertin arxasına düşsə də, tezliklə onu ötüb, amma Hülkenberqin arxasına düşüb. Battondan bir dövrə sonra pit-stop keçirən Alonso trasa lider qayıdıb, Massa isə pitdən sonra da üçüncü olub.

49-cu dövrədə Trullinin Lotus-unda motor imtina edib, bir dövrə sonra Uebber Hülkenberqi keçib, 51-ci dövrədə Petrov və 52-ci dövrədə Fettel ilk pit-stoplarını keçiriblər – alman sürücü trasa dördüncü qayıdıb.

Fernando Alonso karyerasında 24-cü, mövsümdə isə 3-cü qələbəsini qazanıb. Mark Uebber çempionatda liderliyini geri qaytarıb, amma ilk beşlikdə mübarizə yenidən qızışıb. Hər halda mövsümün son beş yarışı çox maraqlı olacaq!!!

Sürətli dövrə: Fernando Alonso (Ferrari) – 1:24.139 (52-ci dövrə).

Turnir cədvəli:

Quru, yarışın sonunda yağış. Buludlu. Havanın temperaturu +14° C, trasın temperaturu +16° C

Bu il Formula1-in Spa uik-endinin heç bir sessiyası yağışsız ötüşməyib. Hava proqnozu yarışa da böyük ehtimalla yağış yağmasını söyləyirdi. Nəticədə məhz yağış Qran Prinin həlledici faktoru oldu.

Startda Uebber ləngiyib, Həmilton liderliyi ələ alıb, ikinci dövrədə isə yağış yağmağa başlayıb. Barrikello arxadan Alonsoya çırpılıb və trasa Təhlükəsizlik Maşını (TM) çıxıb. Rubens üçün yubiley 300-cü yarış elə burdaca bitib, Fernando isə keçid təkərlər üçün pitə daxil olub. Amma yağış kəsdiyi üçün sürücülərin heç biri təkərini dəyişməyib.

Restart zamanı Fettel Kubitsanı qabaqlayaraq üçüncülüyə yüksəlib, bir dövrə sonra isə Alonso sliklər üçün boksa qayıtmalı olub.

On birinci dövrədə Petrov Rosberqi qabaqlayıb, Niko əks hücuma atılıb, fürsətdən istifadə edən Şumaher də komanda yoldaşına hücum edib – iki Mercedes kiçik təmas yaşayıb, Mixael önə keçib, Niko isə ön antiqanadın kiçik bir elementini itirib.

Fettel ikinci yer uğrunda Battona bir neçə hücum edib, Həmilton isə 15-ci dövrədə bu cütlük üzərində üstünlüyünü artıq 9 saniyəyə çatdırıb. İki dövrə sonra növbəti hücum qəza ilə nəticələnib – Censon mübarizəni dayandırıb, yeni burun elementi ilə trasa qayıdan Sebastyan isə stüardlar tətəfindən cərimə alıb. Bununla da alman sürücünün xal qazanmaq şansı puç olub.

Yarışın düz ortasında Sutil ilk pit-stopunu reallaşdırıb, bir dövrə sonra Uebber, 24-cü dövrədə Kubitsa və Massa, 25-ci dövrədə isə Həmilton yumşaq təkərləri bərk təkərlərə dəyişiblər və Lyuis liderliyini saxlayıb. Fettel Liutsini keçərkən daha bir təmas yaşanıb – italiyalı sürücü burun elementini itirib, alman sürücünün maşınında isə təkər partlayıb.

Mercedes GP komandası yağışı gözlədiyi üçün sürücüləri pitə çağırmayıb, nəhayət 35-ci dövrədə liderlər pit-leynə girişi keçdikdən sonra yağış başlayıb. İlk dördlükdən başqa arxada gələn bütün sürücülər yağış təkərləri üçün pit-leynə axışıblar. Növbəti dövrədə isə Həmilton, Kubitsa, Uebber və Massa pit-stop ediblər – Kubitsa vaxt itirdiyi üçün trasa Uebberin arxasında qayıdıb. Rosberq isə doqquzuncu yerdən yeddinci yerə yüksəlib.

Yağış güclənib və yeddinci döngənin çıxışında Alonso qəzaya uğrayıb və trasa yenə TM çıxıb.

Finişə dörd dövrə qalmış restart elan olunub, Rosberq Kobayaşi və Şumaheri keçib. Finişə qədər başqa insident baş verməyib. Lyuis Həmilton karyerasında 14-cü, mövsümdə isə üçüncü qələbəsini qazanıb. Şəxsi hesabda Lyuis liderliyi ələ alıb, amma Mühəndislər Kubokunda Red Bull McLaren-i cəmi bir xal qabaqlayır. Bizi çempionatın çox maraqlı sonluğu gözləyir!

Sürətli dövrə: Lyuis Həmilton (McLaren) – 1:49.069 (32-ci dövrə).

Qeyd: Xayme Algersuari yekun nəticəsinə 20 saniyə əlavə edilməklə cərimə olunub.

Turnir cədvəli:

Quru. Günəşli. Havanın temperaturu +28° C, trasın temperaturu +45° C

Macarıstan yarışından sonra çempionat yay tətilinə çıxır, ona görə də hamı Hunqarorinqdə maksimum nəticə göstərməyə çalışır ki, məzuniyyətə yaxşı əhval-ruhiyə ilə yollansın.

Startda Fettel poulun üstünlüyünü saxlaya bilib və birinci döngəyə lider girib, üçüncü yerdən start almış Alonso Uebberi qabaqlayıb, Petrov iki yer qazansa da, tezliklə Həmiltonu irəli buraxıb. İkinci dövrədə isə Algersuarinin maşınında motor imtina edib.

Onuncu dövrəyə kimi vəziyyət stabilləşib, Fettel hər dövrə Fernandodan bir saniyə uzaqlaşıb, hamı ilk pit-stopları gözləyib.

On beşinci dövrədə Batton boksa baş çəkib, Vitantonio Liutsi ön antiqanadını itirib və trasa Təhlükəsizlik Maşını (TM) çıxıb. Sürücülərin əksəriyyət boksa yönəlib, Sutil və Kubitsa pit-leyndə toqquşub, amma polşalı sürücü kiçik təmirdən sonra trasa qayıda bilib. Rosberq isə pitdən çıxarkən arxa təkərini itirib, təkər mexaniklərdən birini yaralayıb, sürücü isə mübarizəni dayandırıb.

Uebber pitə girməyib və peletona başçılıq edib, Barrikello və Trulli də trasda qalıblar. TM trası tərk etdikdən sonra Mark yumşaq təkərlərlə hücuma keçib və sıralanma turu rejimində yüksək nəticələr göstərməyə davam edib.

23-cü dövrədə yarışın stüardları Kubitsaya pit-leyndən keçməklə 10 saniyəlik stop&go cəriməsi elan ediblər, cəriməsini keçdikdən sonra liderdən 2 dövrə geri qalan polşalı sürücü yarışı dayandırıb. Həmilton isə ötürmələr qutusundakı problemlər üzündən mübarizəni dayandırıb. Stüardlar isə Fettelə də pit-leyndən keçməklə cərimə elan ediblər – alman sürücü restart zamanı Markdan çox geri qalıb. Fettel trasa Alonsonun arxasında, Massanın önündə qayıdıb.

Uebber bir-birinin ardınca sürətli dövrələr göstərməklə 42-ci dövrədə Alonso ilə fərqi 24 saniyəyə çatdırıb və növbəti dövrədə rahat pitə yönəlib – Mark yarışın yarıdan çoxunu yumşaq təkərlərlə keçirib. Bərk təkərlərlə trasa Alonsonun düz önündə dönən avstraliyalı sürücü sürətli dövrələrə imza atmaqla tezliklə fərqi yenidən 20 saniyəyə çatdırıb. Arxada isə Fettel Alonso ilə mübarizəyə girişib.

Bərk təkərlərlə start almış Rubens 55-ci dövrədə pit-stop keçirib və beşinci yerdən 11-ci yerə düşüb. Amma yumşaq təkərləri tezliklə qızdıran braziliyalı veteran sürücü keçmiş komanda yoldaşı Mixael Şumaherlə onuncu yer uğrunda gərgin mübarizəyə girişib. Çoxsaylı həmlələrdən sonra nəhayət yeddiqat dünya çempionunu start-finiş düzlüyündə keçib, amma alman sürücü bu zaman Rubensi pit-divarına sıxmaqla qaydaları pozub və bu insident stüardlar tərəfindən araşdırılacaq.

Mark Uebber karyerasında altıncı, mövsümdə isə dördüncü qələbəsini qazanıb, avstraliyalı sürücü yenidən çempionatın liderinə çevrilib. Fernando Alonso finişi ikinci, Sebastyan Fettel isə üçüncü keçib. Mühəndislər Kubokunda da Red Bull liderliyi ələ keçirib.

Qarşıda böyük yay tətili gəlir, Spaya qədər 4 həftə vaxt var, amma payızda bizi maraqlı yarışlar gözləyir!

Sürətli dövrə: Sebastyan Fettel (Red Bull) – 1:22.362 (70-ci dövrə).

Turnir cədvəli:

Quru. Buludlu. Havanın temperaturu +23° C, trasın temperaturu +35° C

Almaniya Qran Prisinin start düzümü maraqlı yarış vəd edirdi, Red Bull sürücülərini bir-birindən Ferrari sürücüləri ayırırdılar, McLaren sürücüləri isə üçüncü cərgədən yarışa qatılacaqdılar. Mövsümün bir çox yarışlarında Red Bull sıralanma turunda qazandığı üstünlüyü yarışda əldən verib, ona görə də start maraqla gözlənilirdi.

Startda isə hər iki Ferrari sürücüsü Fetteli qabaqlayıb – Massa liderliyi ələ alıb, Həmilton isə Batton və Uebberi keçib, Toro Rosso və Force İndia sürücüləri isə tam heyətlə boksa yönəliblər. Növbəti dövrələrdə vəziyyət stabilləşib və hamı ilk pit-stopları gözləyib.

Artıq 13-cü dövrədə Fettel təkərlərini dəyişib, növbəti dövrədə Alonso və Uebber, 15-ci dövrədə Massa, Həmilton, Şumaher, Barrikello və Kobayaşi pitə müraciət ediblər. Bəzi sürücülər SuperSoft təkərlərlə tempi itirmədən daha böyük məsafə qət ediblər. Batton 23-cü dövrədə pit-stop keçirməklə Uebberi qabaqlayıb və düz komanda yoldaşının arxasına düşüb. Növbəti dövrədə pit-stop keçirən Petrov isə Kobayaşi və Barrikellonu qabaqlayıb.

Niko Hülkenberq yalnız 35-ci dövrədə yumşaq təkərlərini bərk təkərlərə dəyişib. Daha bir dövrə sonra isə Pedro de la Rosa bərk təkərləri yumşaq təkərlərlə əvəzləyib.

Ferrari sürücüləri bir-birinin ardınca sürətli dövrələr göstəriblər, Alonso Massanın tam arxasında yarışı davam etdirib, amma 48-ci dövrədə Felipe qulaqlarında komandanın əmrini eşidib və növbəti dövrədə Alonsonu irəli buraxıb.

60-cı dövrədə isə Pedro Kovalaynenin maşınına toxunub və ön antiqanadını dağıdıb, Pedro yeni antiqanadla yarışı davam etdirib, Heykki isə yarışı dayandırıb.

Fernando Alonso mövsümdə ikinci, karyerasında isə 23-cü qələbəsini qazanıb, Felipe Massa qırmızı Skuderiyaya mövsümün ikinci dublunu qazandırıb. Çempionatda mübarizə bir az da gərginləşib…

Sürətli dövrə: Sebastyan Fettel (Red Bull) – 1:15.824 (67-ci dövrə).

Turnir cədvəli:

Quru. Günəşli. Havanın temperaturu +22° C, trasın temperaturu +40° C

Birinci döngədə Mark Uebber pouldan start almış komanda yoldaşı Sebastyan Fetteli qabaqlayıb, əks-hücuma atılan alman sürücünün maşınında Lyuis Həmiltonla mübarizə zamanı arxa sağ təkəri deşilib və Maggots döngəsində trasdan çıxıb. Üçüncü yerdən start almış Fernando Alonso da bir neçə mövqe itirib, hətta onu qabaqlamış komanda yoldaşı Felipe Massaya hücum zamanı braziliyalı sürücünün maşınında arxa sağ təkəri partladıb – Fettel və Massa pitə təkər dəyişməyə yollanıblar.

Uebber və Həmilton sürətlə peletondan uzaqlaşmağa başlayıblar, artıq onuncu dövrədə avstraliyalı sürücü Lyuisi 3.0 saniyə, Robert Kubitsanı isə 14.0 saniyə qabaqlayıb. Onuncu dövrədə Lukas di Qrassi maşını boksda saxlamalı olub, iki dövrə sonra isə planlı pit-stoplar başlayıb – yumşaq təkərləri bərk təkərlərə birinci Mixael Şumaher dəyişib. 13-cü dövrədə mexaniklər Alonsonu, Barrikellonu və Kobayaşini, 14-cü dövrədə Kubitsa və de la Rosanı, 16-cıda Rosberqi, Sutili, Petrovu və Həmiltonu qəbul ediblər. 17-ci dövrədə pitə müraciət edən Uebber trasa lider olaraq qayıdıb.

Pitdən sonra Rosberq Kubitsanı qabaqlasa da, Alonso polşalı sürücünün arxasında qalıb və on səkkizinci dövrədə döngəni kəsməklə rəqibini qabaqlayıb. Bu manevrdən iki dövrə sonra Robert boksda yarışı dayandırıb. İyirmi ikinci dövrədə isə Batton təkər dəyişimi edib.

İyirmi altıncı dövrədə stüardlar Alonsoya pit-leyndən keçməklə cərimə elan ediblər, elə bu dövrədə Sutil və de la Rosa yüngül toqquşma yaşayıblar, nəticədə ispaniyalı sürücünün maşınında arxa antiqanad dağılıb və trası qırıntılarla doldurub. Bir dövrədən sonra trasa Təhlükəsizlik Maşını (TM) çıxıb.

Otuzuncu dövrədə TM trası tərk etdikdən sonra Alonso cəriməsini çəkib və trasa sonuncu qayıdıb. TM-in arxasında peleton toplaşdığı üçün Fettel hücuma keçib və bir-birinin ardınca Buemini, Massanı, Algersuarini və Petrovu keçərək ilk onluğa daxil olub. Qırxıncı dövrədə Massa, bir dövrə sonra isə Petrov pit-stop keçiriblər. 46-cı dövrədə isə Algersuari trasdan çıxaraq mübarizəni dayandırıb.

Fettel Hülkenberqi, Şumaheri keçərək Sutillə uzunmüddətli mübarizəyə girişib. Finişə iki dövrə qalmış Alonso boksa baş çəkib, sonuncu dövrədə isə Fettel Sutili də keçib və yeddinciliyə yüksəlib. Alonso son dövrədə yeni təkərlərlə sürətli dövrəyə imza atıb.

Mark Uebber yarışda inamlı qələbə qazanıb, bu Markın karyerasında beşinci, mövsümdə isə üçüncü qələbəsidir. Lyuis Həmilton ikinci, Niko Rosberq isə üçüncü yeri tutub…

Sürətli dövrə: Fernando Alonso (Ferrari) – 1:30.874 (52-ci dövrə).

Turnir cədvəli:

Quru. Günəşli. Havanın temperaturu +27° C, trasın temperaturu +47° C

Startda Fettel poulun üstünlüyünü saxlayıb, Həmilton və Alonso isə zəif start almış Uebberi qabaqlayıblar. Amma birinci dövrənin sonunda Uebber artıq doqquzuncu olub. Petrov da Mercedes GP və Force İndia sürücülərini irəli buraxmaqla 10-cu yerdən 15-ci yerə düşüb.

İkinci dövrədə yarno Trulli boksa baş çəkib, dördüncü dövrədə yenidən boksa müraciət edən italiyalı sürücü kiçik təmirdən sonra trasa qayıdıb.

Səkkizinci dövrədə Uebber və Rosberq yumşaq təkərləri bərk təkərlərə dəyişiblər. Amma iki dövrə sonra Mark 12-ci döngədə arxadan Kovalaynenin Lotus-una çırpılıb – RB6 havaya qalxıb, göydə fırlanıb, başı üstə yerə düşüb, asfaltda bir qədər sürüşdükdən sonra təkərləri üstə fırlanıb və yüksək sürətlə köhnə təkərlərdən qurulmuş qoruyucu baryerlərə çırpılıb. Avstraliyalı sürücü müstəqil maşını tərk edib və tibb maşınında hadisə yerini tərk edib, trasa isə Təhlükəsizlik Maşını çıxıb.

Bütün sürücülər pit-stopa axışıblar, yalnız Kobayaşi və Virgin sürücüləri trasda qalıblar. Bərk təkərlərlə start almış Mixael Şumaher yumşaq təkərlərdə bir dövrə vurduqdan sonra yenidən pitə tələsib və bərk təkərlərə keçib, amma trasa qayıdarkən işıqforun qırmızı siqnalında dayanmalı olub və nəticədə bütün peletonu irəli buraxıb.

On beşinci dövrədə restart elan olunub, Fettel sonuncu döngədə səhvə yol versə də, liderliyini qoruya bilib, arxa cərgələrə düşmüş Alonso Hülkenberqi keçib, üçüncü yerdə gedən Kobayaşinin arxasında isə böyük “qatar” əmələ gəlib.

Beş dövrədən sonra Fettel və Həmilton cütlüyü Kobayaşidən 10 saniyə aralanıblar, daha beş dövrədən sonra isə yarışın stüardları Lyuisə pit-leyndən keçməklə cərimə elan ediblər – britaniyalı sürücü Təhlükəsizlik Maşınını ötüb keçibmiş. Lyuis sürətini artırıb və iki dövrədən sonra cəriməsini ödədikdən sonra yenə də trasa Kamuinin qarşısında qayıdıb, amma artıq Fetteldən 15 saniyə geri düşüb.

Qırxıncı dövrədə liderlər yeni komandaların sürücülərinə arxadan çatıblar, öz aralarında mübarizə aparan Senna və Qlok kiçik təmas yaşayıblar və boksa yollanıblar.

44-cü dövrədə isə elan olunub ki, Batton, Barrikello, Hülkenberq, de la Rosa, Petrov, Sutil, Liutsi, Buemi və Kubitsanı TM-in arxasında sürət rejimini pozduqları üçün stüardlar tərəfindən yarışdan sonra araşdırma gözləyir.

51-ci dövrədə Hülkenberqin maşınında arxa sağ təkər dağılıb. İki dövrə sonra isə Kobayaşi ilk pit-stopuna yönəlib və üçüncü yerdən doqquzuncu yerə düşüb. Yaponiyalı sürücü təzə yumşaq təkərlərlə sondan əvvəlki dövrədə Alonsonu və yarışın sonuncu döngəsində Buemini qabaqlaya bilib.

Sebastyan Fettel isə yarışı qələbə ilə başa vurub, bu onun mövsümdə ikinci, karyerasında isə yeddinci qələbəsidir. Podiumun iki aşağı pilləsini McLaren sürücüləri tutublar, amma nəticələr hələ stüardların iclasından sonra təsdiq olunacaq.

Sürətli dövrə: Censon Batton (McLaren) – 1:38.766 (54-cü dövrə).

Qeyd: Finişdən sonra Censon Batton, Rubens Barrikello, Robert Kubitsa, Adrian Sutil, Sebastyen Buemi, Pedro de la Rosa, Vitaliy Petrov, Vitantonio Liutsi və Niko Hülkenberq yekun nəticələrinin üzərinə 5 saniyə əlavə edilməklə cərimə olunublar – bu sürücülər Təhlükəsizlik Maşını trasda olarkən sürət limitini aşıblar.

Timo Qlok isə mavi bayraqlara məhəl qoymadığı üçün yekun nəticəsinin üzərinə 20 saniyə əlavə olunmaqla cərimə olunub.

Turnir cədvəli:

Quru. Buludlu. Havanın temperaturu +26° C, trasın temperaturu +39° C

Kanadada mövsümdə ilk dəfə olaraq güclü komandalar yarışa müxtəlif təkər strategiyası seçiblər. Sıralanma turunun sonunda Mark Uebber, Sebastyan Fettel və Robert Kubitsa ən yaxşı nəticələrini Medium tərkiblərində göstəriblər – bu təkərlər yaxşı sürət yığmasalar da, SuperSoft kimi tez dənlə örtülmür və tez yeyilmir, bu isə yarışın birinci hissəsində böyük üstünlük verə bilərdi.

Pessimistlər deyirdilər ki, yumşaq təkərlər cəmi bir neçə dövrə tab gətirəcək, amma Kanada yarışının startı adətən qəzalarla zəngin olur və Təhlükəsizlik Maşınının trasa çıxması strategiyaları qarışdıra bilərdi.

Daha bir müahisəli məsələ pit-stopların sayı olub. Bridgestone-un nümayəndələri bildiriblər ki, yarışın gedişində ən azı 2 pit-stop lazım gələcək – böyük məsafəyə heç bir təkər tərkibi dözə bilməyəcək.

Bazar günü səhər isə Red Bull komandası Mark Uebberin maşınında ötürmələr qutusunu dəyişdiyini bildirib – sistemlərin yoxlanması zamanı nasazlıq müəyyən edilib, qutu dəyişdirilidyi üçün avstraliyalı sürücü startda beş yer itirməli olub.

Startdan sonra ilk dördlük mövqelərini qoruyub saxlayıb, Uebber 7-ci yerdən 5-ci yerə, Kobayaşi 18-ci yerdən 10-cu yerə yüksəlib, Rosberq isə 10-cu yerdən 14-cü yerə düşüb. Kamui birinci dövrəni başa vura bilməyib, Petrov və de la Rosa, Liutsi və Massa toqquşublar, nəticədə Pedro, Vitantonio və Felipe boksa baş çəkməli olublar. Beşinci dövrədə Uebber təkərləri tam yeyilmiş Battonu keçərək dördüncü yerə yüksəlib.

Bir dövrə sonra Rosberq və Trulli pit-stopa müraciət ediblər, 7-ci dövrədə Batton, Sutil və Hülkenberq də yumşaq təkərləri bərk təkərlərə dəyişiblər. Növbəti dövrədə Lyuis Həmilton və Fernando Alonso birlikdə pit-stop keçiriblər, pit-leynlə paralel hərəkət etdikdən sonra daha əlverişli mövqeyi sayəsində ispaniyalı sürücü irəli çıxıb.

Bu zaman stüardlar falstarta görə Vitaliy Petrova pit-leyndən keçməklə cərimə elan ediblər.

Bütün yumşaq təkərlər bərk təkərlərlə əvəz olunduqdan sonra növbə Medium təkərlərdə start almışlara çatıb – artıq onuncu dövrədə Kubitsa pitə baş çəkib, 13-cü dövrədə Şumaher, 14-cüdə Uebber və 15-cidə Fettel, amma yalnız Sebastyan SuperSoft tərkibini seçib.

Elə həmin dövrədəcə Həmilton Alonsonu keçərək yarışda liderliyi ələ alıb, peletonda vəziyyət stabilləşib və hamı ikinci pit-stoplar dalğasını gözləyib.

24-cü dövrədə Massa,sonrakı dövrədə Hülkenberq və Liutsi, 26-cıda Algersuari, Qlok, Petrov, Həmilton və Kubitsa, 27-ci dövrədə Batton, Fettel və Sutil, 28-ci dövrədə isə Alonso mexaniklərinə qonaq olublar. Stüardlar Hülkenberqi pit-leyndə sürət həddini aşdığı üçün cərimə ediblər. 32-ci dövrədə isə Pedro de la Rosanın maşınında növbəti Ferrari motoru imtina edib – Sauber-in hər iki sürücüsü növbəti dəfə finiş görməyib.

42-ci dövrədə Massa və Trulli pit-stopa müraciət ediblər, amma növbəti dövrədə Yarno pitə qayıdıb və maşını tərk edib.

İkinci təkər dəstində Uebber ən gec pitə müraciət edib, amma avstraliyalı sürücü bir neçə dövrə ərzində 10 saniyəlik üstünlüyünü itirib və 50-ci dövrədə Həmilton onu keçib. Bundan sonra Mark pitə gedib və trasa komanda yoldaşı Fettelin arxasında beşinci qayıdıb.

56-cı dövrədə Batton Alonsonu keçib – ispaniyalı sürücü Çandhoku bir dövrə qabaqlayarkən səhvə yol verib. 64-cü dövrədə bir-birinin ardınca Algersuarini, Liutsini və Sutili arxada qoymuş Massa keçmiş komanda yoldaşı Şumaheri də keçərkən ön antiqanadını zədələyib və boksa yönəlib – bu insident yarışdan sonra stüardlar tətəfindən araşdırılacaq.

Təkərləri tam yeyilmiş Mixael Şumaher sonuncu dövrədə Force İndia komandasının sürücülərinin hücumlarına məruz qalıb – əvvəl Liutsi, daha sonra isə Sutil yeddiqat dünya çempionunu xal qazanmaqdan mərhum ediblər.

Maraqlıdır ki, bu dəfə Kanada yarışı Təhlükəsizlik Maşını olmadan ötüşüb. Lyuis Həmilton ikinci ardıcıl və karyerasında 13-cü qələbəsini qazanıb. Censon Batton ikinci dəfə ardıcıl olaraq McLaren-ə qələbə dublu qazandırıb…

Sürətli dövrə: Robert Kubitsa (Renault) – 1:16.972 (67-ci dövrə).

Qeyd: Felipe Massanın (Ferrari) finişdəki nəticəsinə 20 saniyə əlavə olunub.

Turnir cədvəli:

Quru. Buludlu. Havanın temperaturu +27° C, trasın temperaturu +37° C

Sürücülər start düzlüyündə düzülərkən Virgin komandası Lukas di Qrassinin maşınında motoru dəyişib qurtarıb və braziliyalı sürücü yarışa pit-leyndən qoşulmalı olub.

Mark Uebber birinci döngədə poulun üstünlüyünü saxlaya bilib, Fettel Həmiltonu qabaqlasa da, bir neçə döngədən sonra Lyuis mövqeyini geri qatarıb. Batton isə Mixaeli keçməklə startda itirdiyi mövqeyini qaytarıb – ilk doqquzluq start mövqeyində yarışı davam etdirib. Birinci dövrənin sonunda Hülkenberq və Buemi pit-stopa müraciət ediblər.

Vəziyyət stabilləşib, Həmilton Uebberə hər dövrədə həmlələr edib, amma onların maşınları trasın müxtəlif sahələrində sürətli olduqları üçün aralarındakı fərq gah azalıb, gah da artıb. Amma sürücüləri hər dövrənin sonunda yarım saniyə ayırıb.

On birinci dövrədə Kobayaşi və Barrikello pit-stoplar dalğasına start veriblər – onalrın ardınca Alonso (12-ci dövrədə), Petrov, Sutil və de la Rosa (13), Kubitsa, Massa və Liutsi (14), Fettel və Şumaher (15), Uebber və Həmilton (16) təkərlərini dəyişmək üçün pit-stopa baş vurublar. Mark trasa Fettelin önündə, Lyuis isə arxasında qayıdıb.

Həmin zaman yarışa liderlik edən Censon Batton boksa 17-ci dövrədə yollanıb və düz Lyuisin arxasında trasa qayıdıb. Red Bull və McLaren sürücüləri peletonu böyük fərqlə qabaqlamaqla yarışı sıx mübarizədə davam etdiriblər.

24-cü dövrədə komandalar hava radarından yağış ehtimalı barədə məlumat alıblar – avtodroma tərəf qara buludlar hərəkət edib, asfalt isə soyumağa başlayıb.

35-ci dövrədə Yarno Trulli maşını trasda saxlayıb, bir dövrə sonra isə Heykki Kovalaynen digər Lotus-u boksda saxlayıb.

Liderlər qrupunda vəziyyət uzun müddət stabil qalıb, amma 40-cı dövrədə Fettel komanda yoldaşına hücum edib – 12-ci döngədə maşınlar toqquşub, Sebastyan yarışı dayandırıb, Mark isə boksda maşının burun elementini dəyişdirərək yarışı davam etdirib. Peleton çox arxada olduğu üçün Mark trasa McLaren sürücülərinin arxasında üçüncü qayıdıb.

46-cı dövrədə trasın bəzi sahələrinə yağış damcıları düşsə də, asfalt quru qalıb. Üç dövrə sonra Batton Həmiltonu keçib, amma start düzlüyünün sonunda Lyuis liderliyini bərpa edib. Komanda sürücülərinə yanacağın kəskin az olmasını xəbər verib və mübarizəyə son qoyulub.

50-ci dövrədə Bruno Senna yarışı dayandırıb, 54-cü dövrədə isə Alonso Petrovu qabaqlayıb – kiçik toqquşma zamanı rusiyalı sürücünün maşınında qabaq təkər partlayıb. 56-cı dövrədə Karun Çandhok ikinci Hispania maşınını da boksda saxlayıb. Sonuncu dövrədə isə yeni təkərlər almış Petrov ən sürətli dövrəyə imza atıb.

Lyuis Həmilton mövsümdə birinci, karyerasında isə 12-ci qələbəsini qazanıb. Censon Batton finişdə ikinci olmaqla, McLaren komandasına mövsümün ikinci qələbə dublunu yaşadıb. Mövsümün lideri Mark Uebber podiuma qalxıb. Sauber komandası və Kamui Kobayaşi mövsümdə ilk xallarını qazanıblar…

Sürətli dövrə: Vitaliy Petrov (Renault) – 1:28.195 (57-ci dövrə).

Turnir cədvəli:

Quru. Günəşli. Havanın temperaturu +21° C, trasın temperaturu +37° C

Monako uik-endi zamanı keçirilmiş bütün dəstək yarışlarında qələbəni pouldan start almış sürücülər qazanıb – Monakoda sıralanma turu və effektiv startdan çox şey asılıdır.

Formula1 yarışının da startında Uebber öz mövqeyini qoruya bilib, onun komanda yoldaşı Sebastyan Fettel isə Robert Kubitsanı qabaqlayıb, Rubens Barrikello isə Batton, Şumaher və Rosberqi keçərək altıncı yerə yüksəlib. Birinci dövrədə tunelin çıxışında Niko Hülkenberq qəzaya uğrayıb və trasa Təhlükəsizlik Maşını (TM) çıxıb. Fürsətdən istifadə edən pit-leydən start almış Fernando Alonso tez boksa yönəlib və təkər dəyişimi edib. Bir dövrə sonra eyni addımı Bruno Senna təkrarlayıb. TM-in arxasında Censon Battonun maşınında motor qızıb və işləməkdən imtina edib – mexaniklər radiatorun qapağını açmağı unudublar.

Altıncı dövrədə TM trası tərk edib, restart zamanı heç kim mövqe qazanmayıb. Yalnız Alonso peletonun quyruğunda yeni komandaların sürücülərinə hücuma başlayıb. On altıncı dövrədə ikiqat dünya çempionu yeni komandaların bütün sürücülərini arxada buraxıb, iki dövrə sonra Lyuis Həmilton pit-stop keçirib və düz Alonsonun qarşısında trasa qayıdıb. İspaniyalı sürücü bütün yarışı Medium təkərlərlə keçirməyi qərara alıb, amma təkərlər buna dözəcəkmi?

İyirminci dövrədə Massa, Barrikello, Şumaher və Liutsi pit-stopa tələsiblər, Mixael keçmiş komanda yoldaşı Rubensi burada keçib. Daha iki dövrə sonra Kubitsa və Petrov Renault komandasının boksuna baş çəkiblər. Növbəti dövrədə isə Fettel və Sutil, daha sonra Uebber təkər dəyişimi ediblər. Pedro de la Rosa hidravlik problemlər üzündən maşını boksda, Timo Qlok isə asılqan problemləri üzündən trasda saxlayıb.

28-ci dövrədə Lukas di Qrassi və Kamui Kobayaşi yarışı dayandırıblar, ikinci yerdən pit-stopa gedən Rosberq trasa Alonso və Şumaherin arxasında qayıdıb. Üç dövrə sonra Barrikello Massenet döngəsinin çıxışında qəzaya uğrayıb, Vitaliy Petrovun maşınında sağ arxa təkər deşilib – rusiyalı sürücü pitə getməli olub, trasa TM çıxdığı üçün Vitaliy ilk onluqdan 1 dövrə geri qalıb. Restartda sürücülərin mövqeyi dəyişməyib.

43-cü dövrədə TM yenidən trasa çıxıb, amma bu dəfə qəza baş verməyib, sadəcə üçüncü döngədə drenaj sisteminin qapağı açılıb. Bir dövrədən sonra yarış davam etdirilib.

61-ci dövrədə Kovalaynen və Senna boksda dayanıblar, 74-cü dövrədə isə Çandhok və Trulli Rascasse döngəsində toqquşublar – TM dördüncü dəfə trasa çıxıb. Vitaliy Petrov boksa girib və yarışı dayandırıb.

TM finişdən qabaq sonuncu döngədə trası tərk edib və yarışın son metrlərində Şumaher Alonsonu qabaqlayıb – təkərləri yeyilmiş F10 sürətlənmədə kənara qaçıb. Yarışı isə Mark Uebber inamla qələbə ilə başa vurub. Bu avstraliyalı sürücünün ikinci ardıcıl və karyerasında dördüncü qələbəsidir, Red Bull komandası mövsümdə ikinci dubluna imza atıb – Sebastyan Fettel finişdə ikinci olub, Robert Kubitsa isə mövsümdə ikinci podiumunu qazanıb.

Çempionatda vəziyyət lap gərginləşib, ilk dörd sürücünü səkkiz xal ayırır – hər iki çempionata Red Bull başçılıq edir, Mark yalnız qələbələrin sayına görə Sebastyanı üstələyir…

Sürətli dövrə: Sebastyan Fettel (Red Bull) – 1:15.192 (71-ci dövrə).

Qeyd: Mixael Şumaher son dövrədəki insidentə görə yekun nəticəsinin üzərinə 20 saniyə əlavə olunmaqla cərimə olunub.

Turnir cədvəli:

Quru. Günəşli. Havanın temperaturu +21° C, trasın temperaturu +37° C

Red Bull sürücüləri dünən sıralanma turunda böyük üstünlüyə malik idilər, hamını bir sual maraqlandırırdı – komanda İspaniya Qran Prisində də qələbə dubluna imza ata biləcəkmi?

Qızdırma dövrəsindən əvvəl Lotus-un müxanikləri Kovalaynenin maşınını boksa çəkiblər və finlandiyalı sürücü yarışın startına çıxa bilməyib. Startda isə ilk altılıq yerlərini qoruyub, Kubitsa Kobayaşi ilə toqquşub və hər iki sürücü yer itiriblər, Algersuari isə altı mövqe qazanıb. Bruno Senna elə birinci dövrədəcə trasdan çıxıb, Buemi və de la Rosa isə pit-stopa baş çəkiblər. Bundan sonra trasda vəziyyət stabilləşib.

Liutsi artıq 13-cü dövrədə təkərlərini dəyişmək üçün pitə gedib və pit-stop dalğasına start verib: onun ardınca Petrov (14-cü dövrə), Şumaher, Massa və Rosberq (15-ci dövrə), Fettel, Alonso və Batton (16-cı dövrə), Uebber və Həmilton (17-ci dövrə) təkərlərini dəyişiblər. Rosberq pitdə ləngiyib və xeyli mövqe itirib, Şumaher Battonu, Həmilton isə Fetteli qabaqlayıb. Lyuis dərhal Sebastyandan uzaqlaşsa da, Censon finişə qədər yeddiqat dünya çempionuna hücum edib.

Yarışın 21-ci dövrəsində Pedro yarışı dayandırıb – Sauber-in problemləri davam edir, 23-cü dövrədə Buemi Liutsi ilə insidentinə görə pit-leyndən keçməklə cərimə alıb. 29-cu dövrədə Çandhoku keçən Algersuari hindistanlı sürücünün maşınını kobudcasına trasdan çıxarıb və buna görə pit-leyndən keçməklə cərimə alıb. Zədələnmiş ön antiqanadını dəyişən Karun bir dövrə sonra maşınını trasın kənarında saxlayıb.

Yarışın düz ortasında – 33-cü dövrəsində Hülkenberq ikinci dəfə təkərlərini dəyişib, 37-ci dövrədə Rosberq də eyni addımı atıb və bir neçə həmlədən sonra Hülkenberqi keçib. 44-cü dövrədə isə Buemi maşınını boksda saxlayıb.

Finişə 10 dövrə qalmış Fettel trasdan çıxıb və təkərlərini dəyişmək üçün pit-stopa yönəlib, alman sürücü trasa Alonsonun arxasında dördüncü qayıdıb. Bundan sonra Sebastyanın maşınında əyləclərlə problemlər peyda olub və komanda sürücüdən sürətini azaltmasını xahiş edib.

Finişə iki dövrə qalmış Lyuis Həmiltonun maşınında sol ön təkər partlayıb və üçüncü döngədə maşın trasdan çıxaraq baryerlərə çırpılıb.

Mark Uebber inamla finiş xəttini birinci keçib – Barselonada keçən 20-ci yarışda 16-cı dəfə pouldan start alan sürücü qalib gəlib. Bu avstraliyalı sürücünün mövsümdə ilk, karyerasında isə üçüncü qələbəsidir. Fernando Alonso həmyerlilərinin önündə 10 dövrə ərzində dördüncü yerdən ikinci yerə yüksəlib, Sebastyan Fettel isə podiumun aşağı pilləsini qazanıb.

Mixael Şumaher çempionata qayıtdıqdan sonra ən yüksək yeri tutub – podiumun bir addımlığında dayanıb. Censon Batton beşinci olsa da, çempionatda liderliyini qoruyub saxlayıb, Felipe Massa isə yarışı altıncı yerdə başa vurub…