F-1.az xəbər verir ki, Spanın 6 saatlıq marafonu çətin hava şəraitində, yağışdan sonra quruyan trasda baş tutub və bir çox insidentlə zəngin olub. Eyni zamanda, 2023-cü ildə ən böyük tamaşaçı tribunalardan yarışı izləyib: 70 mindən çox azarkeş avtodromun tribunalarından və bir xeyli azarkeş ətraf təpələrdən marafonu seyr edib.
Kamui Kobayaşi, Maykl Konvey və Xose Mariya Lopesdən ibarət 7 saylı Toyota maşını qələbəyə sevinib, lakin buna səbəb ekipajın yarışa pouldan başlaması deyil. Cəsarətli taktika uğurun açarı olub, çünki asfalt hələ də yağışdan islanmış olsa da, üçlük risk etmək qərarına gəlib və starta sliklərlə çıxıb. Ferrari-nin hiperkar sürücüləri də daxil olmaqla digər sürücülər isə daha diqqətli olmağı seçiblər və yağış təkərlərində yarışa başlayıblar.
Yarışın ilk dövrəsində Konvey 7-ci mövqeyə qədər geriləyib, lakin yağış davam etməyib və təhlükəsizlik maşını da trası tezliklə tərk edib, buna görə də hər iki Ferrari hiperkarı da daxil olmaqla rəqiblər təkərləri dəyişdirmək üçün pitə gediblər və ciddi vaxt itkisi ilə üzləşiblər.
7 nömrəli ekipaj liderliyi ələ keçirib, bundan sonra yalnız eyni Toyota idman prototipini idarə edən komanda yoldaşları onlara çata biliblər, baxmayaraq ki, uğursuz sıralanma turundan sonra yarışa sonuncu başlasalar da, 8 saylı ekipaj nəticədə liderdən 16 saniyə sonra ikinci yeri tutub.
6 saatlıq yarışın son dövrəsində Ceyms Kaladonun Les Combes döngəsində xarici radiusla Porsche №5 hiperkarını ötməyə müvəffəq olması sayəsində #51 Ferrari-nin ekipajı da podiuma yüksəlib. Spada üçüncü yer Ferrari zavod komandası üçün bir növ təsəlli mükafatı sayıla bilər: 499P hiperkarının sürəti qələbə qazanmağa yetərli olub, lakin pis taktika və 50 saylı ekipajın yarışın sonunda qəzası buna mane olub.
Bütün sürücülərin Gibson mühərriki ilə təchiz olunmuş eyni Oreca idman prototiplərini idarə etdiyi üçün rəqabətin ən gərgin keçdiyi LMP2 sinfində podiumda yerlər uğrunda mübarizə də son dövrələrə qədər davam edib. Nəticədə Belçikanın WRT komandasının Robert Kubitsa, Lui Deletraz və Rue Andradedən ibarət komandası qalib gəlib. Onlar daha qısa son pit-stop sayəsində United Autosports-dan olan rəqiblərini qabaqlamağı, öz kateqoriyalarında liderliyi ələ keçirməyi və finiş xəttinə qədər bu mövqeyi qorumağı bacarıblar.
Onu da qeyd etmək lazımdır ki, GTE Am sinfində qələbəni Alessio Rovera, Luis Peres Kompank və 22 yaşlı fransalı xanım sürücü Lilu Vadounun daxil olduğu AF Corse komandasının 83 saylı ekipajı qazanıb.
