F-1.az bildirir ki, Stoffel Vandorn 1992-ci il martın 26-da Belçikanın Kortreyk şəhərində anadan olub. Sürücülük karyerasına 6 yaşında kartinqlə başlayan Stoffel 10 il sonra – 16 yaşında KF2 kateqoriyasında Belçika çempionu olub. Növbəti il isə eyni kateqoriya üzrə dünya 2-cisi olub.
2010-cu ildə təkoturacaqlı maşın yarışlarında debüt edən sürücü F4 Eurocup 1.6 seriyasında gücünü sınayıb və özünü təsdiq edib – debüt ilindəcə seriyanın qalibi olub.
2011-ci ildə KTR komandası ilə Eurocup Formula Renault 2.0 seriyasında çıxış edir və 14 yarışda cəmi 1 dəfə – Hunqarorinqdə podiuma yüksəlir və mövsüm sonunda 5-ci olur. O, həmin il eyni komandanın tərkibində həm də Formula Renault 2.0 NEC seriyasında iştirak edir. Bu seriyada da 14 yarışa çıxır və 8 dəfə podiuma yüksələ bilir. Mövsümü 3-cü yerdə tamamlayır.
Stoffel 2012-ci ildə də 1 il əvvəl iştirak etdiyi seriyalarda mübarizəni davam etdirir. Amma bu dəfə o, Josef Kaufmann Racing komandasının sürücüsü idi. Eurocup Formula Renault 2.0-da 14 yarışda 4 qələbə qazanır və 11 dəfə podiuma yüksəlir. Mövsümü 1-ci yerdə başa vurur. Formula Renault 2.0 NEC seriyasında isə 9-cu yeri tutur.
2013-cü ildə Fortec Motorsport komandasının tərkibində Formula Renault 3.5-də debüt edir. Elə ilk ildəcə özünü təsdiq edən belçikalı mövsümü 214 xalla 2-ci yerdə bitirir.
2014-cü ildə isə daha yuxarı seriyada – GP2-də debüt edir. ART Grand Prix komandası ilə çıxdığı 22 yarışda 4 qələbə qazanan sürücü 10 dəfə də podiuma yüksəlir və mövsümü 2-ci yerdə yekunlaşdırır. Həmin il o, həm də McLaren-Mercedes komandasının test sürücü kimi Formula1-də ilk addımlarını atır.
2015-ci il isə onun üçün çox uğurlu alınır. GP2-də eyni komandanın tərkibində 2-ci mövsümünü keçirir və 21 yarışda 7 qələbə qazanır, 16 dəfə isə podiuma yüksəlir. Mövsümü 341,5 xal toplayaraq çox böyük fərqlə çempion kimi tamamlayır. Eyni zamanda McLaren Honda komandasının test sürücüsü olmaqda davam edir.
Bu il isə o, McLaren Honda-nın ehtiyat sürücüsüdür və eyni zamanda, Docomo Team Dandelion Racing komandası ilə Super Formula seriyasında iştirak edəcək. Seriya 24 apreldə Suzukada başlayacaq və mövsüm 7 yarışdan ibarət olacaq. Son yarış isə 30 oktyabrda yenə də Suzukada baş tutacaq.
Bu gün isə Stoffel üçün əlamətdar gündür. Çünki bu gün onun Bəhreyndə Fernando Alonsonu əvəz edəcəyi açıqlandı. Formula1-ə qədər olan karyerasında olduqca uğurlu çıxış edən sürücü sözsüz ki, Bəhreyndə diqqət mərkəzində olacaq.
Aşağıdakı cədvəldə karyerasına bir daha nəzər salırıq və ona F-1.az saytı olaraq Formula1 karyerasında uğurlar arzulayırıq.
| Mövsüm | Seriya | Komanda | Yarış | Qələbə | Poul | Podium | Xal | Yer |
| 2010 | F4 Eurocup 1.6 | Autosport Academy | 14 | 5 | 5 | 9 | 151 | 1 |
| 2011 | Eurocup Formula Renault 2.0 | KTR | 14 | 0 | 0 | 1 | 93 | 5 |
| Formula Renault 2.0 NEC | 14 | 0 | 3 | 8 | 328 | 3 | ||
| 2012 | Eurocup Formula Renault 2.0 | Josef Kaufmann Racing | 14 | 4 | 6 | 11 | 244 | 1 |
| Formula Renault 2.0 NEC | 7 | 5 | 4 | 6 | 176 | 9 | ||
| 2013 | Formula Renault 3.5 | Fortec Motorsport | 17 | 4 | 3 | 10 | 214 | 2 |
| 2014 | GP2 | ART Grand Prix | 22 | 4 | 4 | 10 | 229 | 2 |
| Formula1 | McLaren Mercedes | Test sürücü | ||||||
| 2015 | GP2 | ART Grand Prix | 21 | 7 | 4 | 16 | 341.5 | 1 |
| Formula1 | McLaren Honda | Test sürücü | ||||||
| 2016 | Super Formula | Docomo Team Dandelion Racing | ||||||
| Formula1 | McLaren Honda | Ehtiyat sürücü | ||||||
