Quru. Qaranlıq. Havanın temperaturu +28° C, trasın temperaturu +30° C

Son 3 Sinqapur Qran Prisində qələbə pouldan start alan sürücülərə qismət olmuşdu, ona görə də çətin şəhər trasında sıralanma turu həlledici əhəmiyyət kəsb edirdi.

Birinci sessiyada artıq bir çox sürücülər SuperSoft tərkibinə keçməli olublar, bu dəfə tərkiblərin sürət fərqi böyük olub, ona görə də ən yumşaq təkərlər ciddi üstünlük qazanıblar – protokollara Roman Qrojan başçılıq edib – 1:47.688. Mübarizəni isə üç ən zəif komandaların sürücüləri ilə birlikdə Kamui Kobayaşi (mövsümdə ilk dəfə) dayandırıb.

İkinci sessiyada artıq bütün sürücülər SuperSoft-a keçiblər. Qrojan ilk cəhdində baryerlərə toxunsa da boksa qayıda bilib və sonra ikinci cəhdinə çıxıb. Bir neçə dəqiqə sonra isə eyni yerdə Senna baryerlərə çırpılıb, amma braziliyalı sürücü maşını tərk etməli olub. Protkollara Lyuis Həmilton başçılıq edib – 1:46.665, mübarizəni isə Hülkenberq, Rəykkönen, Massa, Peres, Rikkardo, Vern və Senna dayandırıblar.

Sonuncu sessiyada trasa çıxmış səkkiz maşından yalnız üçü ilk cəhddində finiş xəttini keçib – Həmilton, Batton və Fettel, digər maşınlar isə boksa qayıdıblar. Şumaher və Rosberq bir daha trasa çıxmayıblar, digər sürücülər isə poul uğrunda mübarizəni davam etdiriblər, amma Həmiltonun nəticəsi əlçatmaz qalıb – 1:46.362.

Beləliklə, Lyuis karyerasında 24-cü, mövsümdə isə 5-ci poulunu qazanıb – McLaren üçün ardıcıl 4-cü poul. Maldonado ikinci yerdən, Fettel və Batton isə ikinci cərgədən start alacaqlar…

Quru. Qaranlıq. Havanın temperaturu +30° C, trasın temperaturu +31° C

Sinqapurda ötmək çox çətindir, ona görə də poul xüsusi əhəmiyyət kəsb edir. Cümə günü sürücülər SuperSoft təkərlərin tez yeyilməsindən narazı idilər, ona görə də sıralanma turunda minimal təkər dəstindən istifadə etməklə maksimal nəticə göstərmək çox önəmli idi.

Birinci sessiyada protokollara Sebastyan Fettel başçılıq edib, mübarizəni isə üç yeni komandanın sürücüləri ilə birlikdə Vitaliy Petrov dayandırıb. Bütün sürücülər 107%-lik səddi keçə biliblər. İkinci sessiyanın ortasında isə marşallar qırmızı bayraqları dalğalandırmalı olublar – on uncu döngənin porebrikində tullanan Kamui Kobayaşinin maşını idarəetməni itirərək divara çırpılıb. Protokollara yenə də Fettel başçılıq edib, mübarizəni isə Bruno Senna ilə birlikdə Toro Rosso, Sauber və Williams sürücüləri dayandırıblar. Beş komanda tam heyətlə son sessiyaya keçib.

Sonuncu sessiyada sürücülər müxtəlif sayda cəhdlər ediblər, Sutil və di Resta heç boksdan çıxmayıblar, Şumaher isə bir dövrəni tamamlamadan boksa qayıdıb.

Sebastyan Fettel mövsümdə 11-ci, karyerasında isə 26-cı poulunu qazanıb. Mark Uebber ikinci olmaqla Red Bull-a tam ilk cərgədən start almaq imkanı qazandırıb. İkinci cərgəni McLaren, üçüncü cərgəni Ferrari, dördüncü cərgəni Mercedes GP, beşinci cərgəni isə Force İndia sürücüləri zəbt ediblər. Start düzümü maşınların sürətinə uyğundur, amma sürücülərin təzə təkər dəstlərinin sayı müxtəlifdir.