Sinqapur-2017: Üçüncü sərbəst yürüşlər

F-1.az bildirir ki, komandalar cümə sərbəst yürüşlərindən sonra sazlanmalara düzəlişlər ediblər və sıralanma turuna hazırlaşmağa kökləniblər – demək olar ki, hamı ən yumşaq UltraSoft təkərlərlə işləyib.

Sessiyanın düz ortasında qırmızı bayraqlar dalğalanıb – Markus Eriksson 19-cu döngədə divarlara çırpıldıqdan sonra trasdakı qırıntıları təmizləmək lazım gəlib. Pauza 6 dəqiqə çəkib, sonra sürücülər işlərini davam etdiriblər.

Rikkardo 10-cu döngədə baryerlərə toxunub və yavaşca boksa qayıdıb, amma mexaniklərin təftişindən sonra işinə davam edib. Ferstappenin maşınında ötürmələr qutusunda problem yaranıb, Maks boksa qayıdıb, sistemi yenidən işə salıblar və Maks da trasa qayıdıb.

Protokola dünən olduğu kimi Red Bull sürücüsü başçılıq edib, amma dünən Rikkardo sürətli idisə, bu gün Maks rəqiblərini üstələyib. Düzdür, avstraliyanın tras rekordu bu gün təzələnməyib, amma sıralanma turunda sürətlər artacaq…