F-1.az xəbər verir ki, çempion komanda üçün mövsümün əvvəli qalmaqallı bir hadisə ilə kölgələnmişdi. Belə ki, adı açıqlanmayan bir əməkdaş Horneri “uyğunsuz davranış”da ittiham etmişdi, o isə bunu qətiyyətlə inkar edirdi. Nəticədə, Horner qalib gəldi, çünki onun işi bağlandı və şikayəti verən şəxs işdən kənarlaşdırıldı. Ümumiyyətlə, bütün bunlar artıq keçmişdə qalıb.
Lakin cəmi bir il ərzində Red Bull-dan Ədrian Nyui, Conatan Vitli və Vill Kortni gediblər. Onlar müvafiq olaraq Aston Martin, Sauber/Audi və McLaren tərəfindən cəlb ediliblər. Ancaq Şumaxer hesab edir ki, problem Hornerdə deyil və onların getməsi başqa səbəblərlə izah olunur.
“Düşünürəm ki, insanlar uzun müddət və uğurla çalışanda daha yüksək vəzifələr əldə etmək istəyirlər, – deyə Ralf Sky Deutschland telekanalına açıqlamasında söyləyib. – Ancaq hazırkı şəraitdə komandada bunun üçün imkanlar yoxdur, boş yerlər yoxdur. Və əgər bu mütəxəssislər digər komandalardan maraqlı maliyyə təklifləri alırlarsa, iş yerini dəyişmək barədə düşünməyə başlayırlar.
Ümumiyyətlə, mən bütün bunları yalnız Hornerlə əlaqələndirməzdim. Belə təəssürat yaranır ki, Red Bull şirkətinin Avstriya və Tailand ortaqları arasında ziddiyyətlər yaranmağa başlayıb. Vaxtilə mərhum Ditrix Mateşiç vəziyyəti nəzarətdə saxlayır və nəyin necə baş verməli olduğuna özü qərar verirdi.
Birmənalı olaraq, indi bu amilin çatışmazlığı hiss olunur. Düşünürəm ki, bu, həm komandaya, həm də Hornerə çatışmır. O, nəhəng təcrübəyə malik bir insandır və adətən öz işini əla yerinə yetirir. Ancaq son bir il yarımdakı hadisələri və tək qaldıqda komandaya necə rəhbərlik etdiyini xatırlasaq, yəqin ki, onun bir qədər qiymətləndirildiyini söyləmək olar”.
