F-1.az xatırladır ki, gənc İrvayn 1993-cü ilin Yaponiya yarışında debüt etmiş və ilk yarışında altıncı yeri tutaraq, mükəmmələ yaxın nəticə qazanmışdı. Lakin yarışdan sonra Senna gənc sürücüyə Jordan komandasının qonaq otağında şillə vurmuşdu və bu hərəkətinə görə 2 yarışdan şərti xaric edilmə cəzası almışdı.
Rubens Barrikello: “Ayrton orada İrvaynı dövrəvi sürücü kimi keçməyə hazırlaşırdı. Ancaq Eddi ona fikir vermədi və normal formada sürməyə davam elədi. Ayrton elə hirslənmişdi ki, yarışdan sonra Jordan-ın qonaq otağına gəldi və mən də orada idim. İrvayna dedi ki, “sənin başın xarab olub? Mavi bayrağın nə işə yaradığını bilmirsən?” İrvayn da cavabında “nə olub ki?” dedi. Bundan sonra Ayrton çox əsəbləşdi və sağ əli ilə Eddiyə şillə vurdu. Ancaq Eddi çox dəlisov idi. Sennanı çox sevirdi və narıncı dəbilqəsi belə Ayrtonun dəbilqəsini xatırladırdı. Yəni ki, sevdiyi adam ona… Ondan sonra komandadakılar ona dedilər ki, əfsanəvi adamdan şillə yemisən. İrvayn bu hadisəyə görə məyus olmadı. Əksinə deyirdi ki, bu şillə oldu, gələcəkdə bu barədə uşaqlarıma və nəvələrimə danışacam”.
