F-1.az xatırladır ki, bir neçə gün əvvəl Mercedes-Benz şirkətinin DTM seriyasını tərk edərək Formula E çempionatında debütə hazırlaşacağı elan olunmuşdu. Bu gün isə analoji qərarı Porsche şirkəti də açıqlayıb – WEC çempionatında Le Manın 24 saatlıq əfsanəvi marafonunda ardıcıl 3 qələbədən sonra bir çox ekspertlərin irəli sürdükləri ehtimal təsdiqini tapıb. Amma hamı güman edirdi ki, almanlar seriya ilə müqavilələri başa çatdıqdan sonra, yəni 2018-ci ilin sonunda bu addımı atacaqlar. Yekunda isə müqavilənin qurtarmasını gözləmədən cari mövsümün sonunda getmək qərarı qəbul olunub.
Eyni zamanda, Porsche-dən təsdiq ediblər ki, şirkət Formula E-nin 6-cı mövsümündə – 2019-2020-ci il mövsümündə zavod komandası ilə debüt edəcək…
Mixael Ştayner, Porsche-nin idarə heyətinin üzvü: “Formula E-də çıxış etmək və bu çempionatda uğur qazanmağa çalışmaq hər bir avtoistehsalçı üçün məntiqi addımdır. Bu çempionatda ekoloji təhlükəsizlik və effektivlik sahələrində yeni texnologiyaların hazırlanmasındakı azadlığın inkişafı bizim üçün cəlbedicidir”.
Frits Entsinger, Porsche Motorsport-un başçısı: “Sıfırdan LMP1 layihəsinin hazırlanması çox çətin məsələ idi, amma bir neçə ilə biz çox uğurlu və peşəkar komanda quraraq, indi yolumuza davam etmək istəyirik. Əminəm ki, biz Formula E-də də bu yüksək səviyyəni saxlayacağıq”.
