F-1.az xəbər verir ki, sürücülər bu döngələri daha yüksək sürətlə keçdikləri üçün şinlər də orada daha yüksək yüklənməyə məruz qalır, buna görə də Pirelli Niderlanda ən sərt tərkibli təkərləri gətirir – C1 (Hard), C2 (Medium), C3 (Soft).
Təkərlərin işinə təsir edən çox mühüm amil istilik deqradasiyasıdır, lakin həmişə olduğu kimi, onun intensivliyi çox cəhətdən havadan asılıdır. Avqustun sonunda Şimal dənizi sahilində hava müxtəlif ola bilər və gün ərzində dəyişə bilər. Lakin orta hesabla bu mövsümdə Zandfortda temperatur 14-dən 20 dərəcəyə qədər dəyişir.
O cümlədən sərin hava ən yumşaq tərkibli şinlərin istifadəsinə şərait yaradır: keçənilki yarışda Yuki Tsunoda Soft-la 50 dövrə getmişdi.
Təkərlərin tras örtüyü ilə ilişməsinə dolayı yolla qonşu təpələrdən asfalta qum gətirən külək də təsir edə bilər.
Keçən il sürücülərin əksəriyyəti ən yumşaq təkərlərlə start götürmüşdü və yalnız Luis Hamilton məsafənin ilk hissəsini Medium-la getməyi üstün tutmuşdu. Lakin startdan az sonra yağış başlamışdı və hamı keçid təkərlərə keçmişdi, onları yarışın sonunda yenidən istifadə etmək lazım gəlmişdi. Red Bull sürücüləri və Alpine-dən Esteban Okon, hətta güclü yağış üçün təkərləri də sınaqdan keçirmişdilər.
Dəyişkən hava səbəbindən komandaların mexanikləri çox işləməli olmuşdular: Niderland Qran Prisi ərzində 82 pit-stop edilmişdi. Bununla belə, bu dəfə yağış olmasa, Pirelli yarış məsafəsini bir pit-stopla getməyin mümkün olduğunu güman edir.
Zandfort trası çox dardır, düzlük hissələr azdır, onlar qısadır, buna görə də orada ötmək çətindir. Əgər kifayət qədər isti olarsa, yarış üçün ən uyğun seçim Hard olacaq, lakin hava daha çox payıza bənzəyərsə, onda ən yumşaq təkərlərin istifadəsi də mümkündür.
Niderland Qran Prisi 2021-ci ildə çempionat təqviminə qayıdıb və artıq keçirilmiş üç yarışın hamısını Maks Ferstappen qazanıb. Əgər o bunu yenidən bacarsa, bu trasda qələbələrin sayına görə əfsanəvi Cim Klarkla bərabərləşəcək: 60-cı illərdə əfsanəvi şotlandiyalı Zandfortda dörd dəfə podiumun ən yüksək pilləsinə qalxmışdı.
