F-1.az xəbər verir ki, standart C1, C2, C3, C4 və C5 tərkibləri ilə yanaşı, yeni mövsümdə yeni ultra yumşaq C6 tərkibi də əlçatan olacaq. Bu yenilik son zamanlar Formula1 təqvimində sayı getdikcə artan şəhər trasları üçün nəzərdə tutulub.
Yeni tərkib üzərində işdən əlavə, Pirelli mühəndisləri 2025-ci il təkərlərinin konstruksiyasını və tərkiblərini daha çox təhlükəsizlik və tamaşa zövqü təmin etmək üçün təkmilləşdiriblər. 2025-ci il mövsümü üçün təkərlərin təsdiqlənməsi müddəti artıq sentyabrın 1-də başa çatıb, lakin tərkib qarışığı üzərində iş testlər zamanı davam edir. Gələn il üçün təkərlərin son variantlarını komandalar mövsümün final yarışından sonra Əbu Dabidə keçiriləcək testlərdə əldə edəcəklər.
Lakin Meksika Qran Prisinin ikinci məşqində bütün komandalar C4 və C5 yumşaq tərkiblərinin prototiplərini sınaqdan keçirə biləcəklər. Yeni rezinin sınaqları üçün sessiyanın müddəti 60 dəqiqədən 90 dəqiqəyə qədər artırılacaq. Gözlənilir ki, italyan istehsalçılar bir neçə C6 tərkibli təkər dəsti də gətirəcəklər, buna görə də komandalar artıq bu ay yeniliyin ilk təəssüratını əldə edə biləcəklər.
