F-1.az xatırladır ki, keçən il mövsümöncəsi testlərin heç bir sessiyasına çıxmayan komanda mövsümün bütün yarışlarına qatılmışdı və bununla da gələcək inkişafın əsasını qoymuşdu. Mövsümün sonunda komanda gələn mövsüm Mercedes güc qurğuları və Williams ötürmələr qutusu almaq üçün müqavilələr imzaladı. Keçən həftə isə Ferrari-nin keçmiş konstruktoru Nikolas Tombasislə müqavilə imzalandı – bütün bu addımlar Manor komandasının yeni sahibinin ciddi iddia və məqsədindən xəbər verir.
Bu gün komandanın mətbuat xidməti Twitter hesabında komandanın yeni adını və loqotipini paylaşıb – komandanın adından Marussia sözü yığışdırılıb və artıq Manor Racing adlanacaq. Digər təfərrüatları isə komanda fevralın 22-də Barselonada mövsümöncəsi testlərin ilk günü bəyan edəcək. Çox güman ki, bizi yeni maşının təqdimatı və sürücülərin elan olunması gözləyir…
