Macarıstan-2020: Sıralanma turu

F-1.az xatırladır ki, ilk məşqlərdə Həmilton hamıdan sürətli olmuş, yağışa görə olduqca az dövrə vurulan ikinci məşqlərdə isə Fettel protokollara başçılıq etmişdi. Bugünkü məşqlərdə isə Bottas komanda yoldaşını minimal fərqlə üstələyərək birinci olmuşdu.

Hunqarorinqdə ötmələr çətin olduğundan və alternativ strategiyalar demək olar ki, mümkün olmadığından, sıralanma turu əsas sessiya hesab olunur – sabah yağış yağmazsa, bütün sürücülərin yarışı bir pit-stopla başa vuracağı gözlənilir. İndiyə qədər burada baş tutan 34 yarışdan 15-də pouldan başlayan sürücülər qalib gəlib.

Pirelli Macarıstana ilk iki yarışda olduğu kimi, orta üçlüyü- C2, C3 və C4 tərkiblərini gətirib. Tərkiblər arasındakı fərq kiçik olub. Dünən ikinci sərbəst yürüşlər yağışlı havada baş tutduğundan, sürücülər sliklərə qənaət edə biliblər.

İlk Sessiyada hamı Soft təkərlərlə çıxıb. Çünki yağıntı ehtimalı olduğundan, sürücülər tez zamanda sürətli dövrə vurmağa çalışıblar. Covinatsinin nəticəsi trasdan tam çıxdığı üçün ləğv edilib. Protokollara Racing Piont sürücüləri başçılıq ediblər – Peres 1:14.681-lik nəticə ilə birinci olub. Rassell sürprizə imza ataraq hətta ilk onluğa düşüb. Hər iki Williams sürücülərinin ilk 15-liyə düşdüyü sessiyada Rəykkönen, Covinatsi, Qrojan, Kvyat və Maqnussen mübarizəni dayandırıblar.

İkinci sessiyada Mercedes, Racing Point və Renault sürücüləri Medium, digərləri isə Soft təkərlərlə trasa çıxıblar. Həmilton məhz bu təkərlərlə keçən ildən Ferstappendə (1:14.572) olan tras rekordunu dərhal yeniləyib. İkinci cəhddə hamı Soft-larla dövrə vursa da, Peres və Stroll Medium-la davam ediblər. Həmilton protokollara başçılıq edib – 1:14.261. Latifi, Okon, Elbon, Rassel və Rikkardo üçün sıralanma turu başa çatıb.

Son sessiyada ənənəvi olaraq, hamı Soft təkərlərlə boksları tərk edib. Həmilton ilk cəhdində 1:13.613-lük nəticə göstərib. Bottas ona 0.3 saniyə uduzub. Yerdə qalanlar ilə isə Mercedes sürücülərinin fərqi 1 saniyədən çox olub. İkinci cəhddə yağış damcılasa da, asfalt quru qalıb və çempion komandanın sürücülərinin nəticələrini bir qədər də yaxşılaşdırmasına mane olmayıb. Həmilton bu dəfə 1:13.447-lik dövrə vurub və Bottas ona cəmi 0.107 saniyə uduzub.

Beləliklə, Lyuis Həmilton komanda yoldaşını üstələyərək bu il ikinci, karyerasında isə 90-cı poulunu əldə edib. İkinci cərgəni Racing Point sürücüləri, üçüncü cərgəni isə bu il hələ ki, ən yaxşı sıralanma turu nəticələrini əldə edən Ferrari sürücüləri tutublar. Əvvəldən yarışın favoritlərindən hesab olunan Ferstappen isə yalnız yeddinci ola bilib.

Yarış sabah Bakı vaxtı ilə 17:10-da baş tutacaq və yağış yağarsa, bizi olduqca maraqlı mübarizə gözləyir. Hunqarorinqdə dəyişkən havanın nələrə səbəb olduğunun 2006-cı ildə şahidi olmuşuq…

Yer	N	Sürücü	Komanda	1-ci sessiya			2-ci sessiya			3-cü sessiya
Yer	N	Sürücü	Komanda	Yer	Zaman	Dövrə	Yer	Zaman	Dövrə	Zaman	Dövrə
1	44	Lyuis Həmilton	Mercedes AMG	3	1:14.907	10	1	1:14.261	6	1:13.447	6
2	77	Valtteri Bottas	Mercedes AMG	7	1:15.474	8	2	1:14.530	6	1:13.554	6
3	18	Ləns Stroll	Racing Point	2	1:14.895	8	7	1:15.176	8	1:14.377	6
4	11	Serxio Peres	Racing Point	1	1:14.681	8	9	1:15.394	8	1:14.545	6
5	5	Sebastyan Fettel	Ferrari	6	1:15.455	9	6	1:15.131	5	1:14.774	6
6	16	Şarl Lekler	Ferrari	13	1:15.793	8	4	1:15.006	6	1:14.817	6
7	33	Maks Ferstappen	Red Bull	8	1:15.495	9	3	1:14.976	6	1:14.849	6
8	4	Lando Norris	McLaren	5	1:15.444	9	5	1:15.085	6	1:14.966	5
9	55	Karlos Sayns	McLaren	4	1:15.281	10	8	1:15.267	6	1:15.027	5
10	10	Pyer Qasli	AlphaTauri	12	1:15.767	9	10	1:15.508	5	–	0
11	3	Daniel Rikkardo	Renault	14	1:15.848	8	11	1:15.661	6
12	63	Corc Rassell	Williams	9	1:15.585	9	12	1:15.698	5
13	23	Aleksander Elbon	Red Bull	11	1:15.722	10	13	1:15.715	6
14	31	Esteban Okon	Renault	10	1:15.719	8	14	1:15.742	6
15	6	Nikolas Latifi	Williams	15	1:16.105	9	15	1:16.544	5
16	20	Kevin Maqnussen	Haas	16	1:16.152	9
17	26	Daniil Kvyat	AlphaTauri	17	1:16.204	9
18	8	Roman Qrojan	Haas	18	1:16.407	8
19	99	Antonio Covinatsi	Alfa Romeo	19	1:16.506	12
20	7	Kimi Rəykkönen	Alfa Romeo	20	1:16.614	12