F-1.az xatırladır ki, Rosberq çempion olduqdan 5 gün sonra təqaüdə çıxdığını açıqlamışdı.
Ferrari-nin prezidenti Sercio Markionne bildirib ki, Rosberqin təqaüdə çıxmasına təəccüblənib və Toto Volffa mesaj göndərib: “Totoya bir mesaj göndərdim. Xəbəri eşidəndə təyyarədə idim və təəccübləndim. Rosberqi cəsarətinə görə təbrik etdim. Doğru zamanı seçmək bu həyatda ən vacib amildir. Formula1-dən çempion kimi gedir. Bundan yaxşısı ola bilməzdi. Niko həyatının böyük hissəsini yarışlara həsr edib. Çempionluq da maksimum hədəfdir. Bu qərarı verdiyi üçün onu təbrik edirəm və Mercedes-in gələn il hansı vəziyyətdə olacağı mənə maraqlıdır. Zəif Mercedes gözləmirəm. Lyuis Həmilton hələ də oradadır. Əminəm ki, onlar gələn il üçün güclü potensiallı sürücü seçəcəklər”.
Ferrari komandasının rəhbəri Mauritsio Arrivabene bildirib ki, Rosberq hədəfinə çatıb və Formula1-dən fərqli həyat axtarır: “Bu dünyada texnologiyaya o qədər fokuslanırıq ki, insan olduğumuzu yaddan çıxarırıq. Qərarına hörmət edirəm. Bəzən sağa-sola baxırıq, amma ürəyimizin və beynimizin olduğunu unuduruq. Niko bunu hiss edirdi və fərqli həyat axtarırdı”.
