İtaliya-2018: Yarış

F-1.az bildirir ki, qırmızılar həm cümə, həm də şənbə günü sərbəst yürüşlərdə öz sürətlərini göstəriblər. Dünən nahardan sonra isə sıralanma turunda 2000-ci ildən bəri ilk dəfə birinci cərgəni tam zəbt ediblər.

Mövsümdə ilk, karyerasında isə 18-ci pouluna Kimi Rəykkönen sevinib – son cəhdində finlandiyalı sürücü slipstrimdən yararlanaraq komanda yoldaşını 0.016 saniyə qabaqlayıb. Mercedes-in sürücüləri ikinci cərgəyə sahib çıxıblar – Həmilton poula 0.2 saniyə uduzub. Üçüncü cərgəni isə Ferstappen və Qrojan tutublar.

Üç sürücü əvvəlcədən yer itirilməklə cəzalandırılmışdı. Niko Hülkenberq – Spa yarışının startındakı insidentə və Montsada yeni güc qurğusunun quraşdırılmasına görə, Daniel Rikkardo – yeni güc qurğusuna görə, Markus Eriksson isə yeni daxiliyanma mühərriyinə görə yarışa sonuncu yerlərdən başlamalı olublar.

Həftəsonunun əsas faktorlarından biri hava şəraiti olub – cümə və şənbə günləri səhər yağış yağıb, amma komanda və sürücülərin işinə ciddi təsir etməyib. Startdan əvvəl narın yağış damcılasa da, asfalt quru qalıb.

Pirelli Montsaya Medium, Soft və SuperSoft tərkiblərini gətirib. Maqnussen, Lekler, Eriksson və Rikkardo start üçün Soft tərkibini seçiblər, digər sürücülər isə SuperSofta üstünlük veriblər.

Startda Rəykkönen liderliyini qoruyub. Vandorn və Erikssonun arasında qalan Hartlinin maşınında asılqan qırılıb. Həmilton ikinci şikananın girişində Fettelə hücum edib, maşınların təkərləri toqquşub, Fettel yerində fırlanıb və peletonun sonuna düşüb.

Hartlinin maşınını təxliyə etmək üçün trasa Təhlükəsizlik Maşını daxil olub. Fettel boksa qayıdaraq ön qanadı dəyişib, Eriksson, Rikkardo və Hülkenberq isə yeni təkərlərə keçiblər. 2-ci dövrənin sonunda ilk onluq: Rəykkönen – Həmilton – Ferstappen – Bottas – Qrojan – Sayns – Okon – Stroll – Sirotkin – Alonso.

4-cü dövrədə restart elan olunub. Həmilton Rəykköneni keçsə də, Kimi əks hücumda mövqeyini qaytara bilib. Fettel Rikkardonun arxasında 17-ci yerdə mübarizə qatılıb.

5-ci dövrədə Maqnussen təkərlərini dəyişib, Rikkardo və Fettel isə Vandornu qabaqlayıblar. Rəykkönen Həmiltondan uzaqlaşmağa çalışsa da, Lyuis fərqin artmasına imkan verməyib – bu ikilik rəqiblərindən uzaqlaşa bilib.

7-ci dövrədə Rikkardo və Fettel Hülkenberqi də arxada qoyublar. 8-ci dövrədə isə Peres Alonsonu, Lekler Qaslini üstələyib. 8-ci dövrədə Fettel keçmiş komanda yoldaşını keçərək 14-cü yerə yüksəlib.

10-cu dövrədə Alonso boksda maşınını saxlayaraq mübarizədən kənar qalıb. 11-ci dövrədə Rikkardo və Qasli arasında təmas yaşanıb, növbəti dövrədə Daniel rəqibini keçə bilib.

14-cü dövrədə Okon Saynsı üstələyərək, 6-cı yerə yüksəlib. Bir dövrə sonra Fettel Sirotkini arxada qoyaraq, ilk onluğa düşüb. 16-cı dövrədə Peres və Fettel Strollu geridə buraxıblar. 16-cı dövrənin sonunda ilk onluq: Rəykkönen – Həmilton – Ferstappen – Bottas – Qrojan – Okon – Sayns – Peres – Fettel – Stroll.

18-ci dövrədə Hülkenberq Qaslini keçib, Fettel isə Peresi arxada qoyub. Rəykkönen və Həmilton arasında fərq bir saniyə civarında stabilləşib, real hücum etməyə sürət fərqi imkan verməyib. 20-ci dövrədə Fettel Saynsı da üstələyib. 20-ci dövrənin sonunda ilk onluq: Rəykkönen – Həmilton – Ferstappen – Bottas – Qrojan – Okon – Fettel – Sayns – Peres – Stroll.

21-ci dövrədə Mercedes-in mexaniklərinin boksu tərk etməsi Ferrari-ni Rəykköneni boksa çağırmaları ilə nəticələnib – strateqin əmri ilə trasda qalan Həmilton sürətini artırıb. 22-ci dövrədə Rikkardo Sirotkini qabaqlayıb.

24-cü dövrədə Fettel Okonu üstələyib, Qrojan boksa yollanıb. 25-ci dövrədə Rikkardonun maşınında problemlər yaşanıb və avstraliyalı sürücü maşınını təhlükəsiz zonada saxlamalı olub. 26-cı dövrədə Vandorn, növbəti dövrədə Ferstappen, 29-cu dövrədə isə Həmilton mexaniklərinə baş çəkiblər.

30-cu dövrədə pit-stopa yollanan Fettel trasa 10-cu yerdə qayıdıb. Almaniyalı sürücü növbəti iki dövrədə əvvəlcə Sirotkini, daha sonra isə Strolu üstələyib.

Rəykkönen və Həmilton sürətlə hələ təkərlərini dəyişməmiş Bottasa yaxınlaşıblar – Valtteri həmyerlisini ləngitdiyi üçün Lyuis pitdən sonra yaranmış fərqi azaldıb. 33-cü dövrədə ilk üçlük 1.5 saniyəyə yerləşib – sürət arasında fərqin azlığı mübarizəni qeyri-mümkün edib.

35-ci dövrədə Qasli və Lekler, 36-cı dövrədə Stroll, 37-ci dövrədə isə Bottas təkərlərini dəyişiblər. Rəykkönen yenidən liderliyi ələ alıb, amma bu dəfə Həmilton düz onun arxasında olub.

38-ci dövrədə Sirotkin, 39-cu dövrədə Okon pit-stop ediblər. Bu zaman Fettel Peresi üstələyərək 5-ci yerə yüksəlib. 40-cı dövrədə Erikssonu keçən Sirotkin 11-ci yerə qalxıb. 40-cı dövrədə Peres və Sayns təkərlərini dəyişiblər, Sayns trasa qayıdan kimi komanda yoldaşını qabaqlayıb. 40-cı dövrənin sonunda ilk onluq: Rəykkönen – Həmilton – Ferstappen – Bottas – Fettel – Qrojan – Okon – Peres – Sayns – Hülkenberq.

43-cü dövrədə Hülkenberq təkərlərini dəyişib. Ferstappen və Bottas arasında təmas yaşanıb, finlandiyalı sürücü trasdan çıxıb. İnsidenti araşdıran stüardlar Maksı 5 saniyəlik cəzalandırıblar. 44-cü dövrədə Eriksson da boksa yollanıb.

45-ci dövrədə Həmilton Rəykköneni üstələyərək liderliyi ələ keçirib. Mühəndisin xahişi ilə Kimi sürətini azaltmalı olub – arxa sol təkər həddindən çox yeyilib. 47-ci dövrənin sonunda ilk onluq: Həmilton – Rəykkönen – Ferstappen – Bottas – Fettel – Qrojan – Okon – Peres – Sayns – Stroll.

Lyuis Həmilton mövsümdə 6-cı, karyerasında isə 68-ci qələbəsinə sevinib. İtaliyada 5-ci qələbəsini qazanan britaniyalı sürücü Mixael Şumaxerlə Montsadakı qələbələrin sayında bərabərləşib.

Kimi Rəykkönen finiş xəttini ikinci keçib – finlandiyalı sürücü 100-cü dəfə podiuma yüksəlib. Finiş xəttini üçüncü Ferstappen keçsə də, onun nəticəsinin üzərinə 5 saniyə əlavə olunub – ona görə də podiuma Valtteri Bottas qalxıb.

Axşam isə stüardlar Renault komandasının qaldırdığı protest əsasında Roman Qrojanın maşınının altlığının ön hissəsinin reqlamenti pozduğunu qeydə alıblar – fransalı sürücü protokollardan xaric edilib. Ona görə də Sergey Sirotkin 10-cu yerə yüksələrək karyerasında ilk xalını qazanıb.

İki həftə sonra mübarizə Sinqapurda davam edəcək…

* Bottasla insidentə görə Ferstappenin yekun nəticəsinə 5 saniyə əlavə olunub
** Qrojan texniki reqlamenti pzoduğuna görə protokollardan xaric olunub

Sürətli dövrə: Lyuis Həmilton (Mercedes AMG) – 1:22.497 (30-cu dövrə, 252.794 km/saat).

MÜBARİZƏNİ DAYANDIRANLAR:

SÜRÜCÜLƏRİN ÇEMPİONATI:

Yer	N	Sürücü	Ölkə	Komanda	Xal
1	44	Lyuis Həmilton		Mercedes AMG Petronas Motorsport	256
2	5	Sebastyan Fettel		Scuderia Ferrari	226
3	7	Kimi Rəykkönen		Scuderia Ferrari	164
4	77	Valtteri Bottas		Mercedes AMG Petronas Motorsport	159
5	33	Maks Ferstappen		Aston Martin Red Bull Racing	130
6	3	Daniel Rikkardo		Aston Martin Red Bull Racing	118
7	27	Niko Hülkenberq		Renault Sport Formula One Team	52
8	20	Kevin Maqnussen		Haas F1 Team	49
9	11	Serxio Peres		Racing Point Force İndia	46
10	31	Esteban Okon		Racing Point Force İndia	45
11	14	Fernando Alonso		McLaren F1 Team	44
12	55	Karlos Sayns		Renault Sport Formula One Team	34
13	10	Pyer Qasli		Red Bull Toro Rosso Honda	28
14	8	Roman Qrojan		Haas F1 Team	27
15	16	Şarl Lekler		Alfa Romeo Sauber F1 Team	13
16	2	Stoffel Vandorn		McLaren F1 Team	8
17	18	Ləns Stroll		Williams Martini Racing	6
18	9	Markus Eriksson		Alfa Romeo Sauber F1 Team	6
19	28	Brendon Hartli		Red Bull Toro Rosso Honda	2
20	35	Sergey Sirotkin		Williams Martini Racing	1

MÜHƏNDİSLƏR KUBOKU: