Quru. Günəşli. Havanın temperaturu +30° C, trasın temperaturu +36° C

Mövsümün sonunda Red Bull komandası çempionatda öz xeyrinə dönüş edə bilib. Sebastyan Fettel ardıcıl 3 qələbə qazanıb və Hindistana çempionatın lideri qismində gəlib. Uik-endin gedişində almaniyalı sürücü bütün məşqlərdə birinci olub və sıralanma turun Red Bull sürücüləri yenə də ilk cərgəni zəbt ediblər. İkinci cərgədə McLaren sürücüləri, üçüncü cərgədə isə Ferrari sürücüləri yer alıblar.

Mövsümdə 3-cü dəfə start düzümü sıralanma turunun nəticələrinə tam uyğun olub – heç kim cərimə almayıb. Startdan əvvəl Pirelli-nin mütəxəssisləri bildiriblər ki, yarış məsafəsini bir pit-stopla da qət etmək olar, amma komandalar yarışın əvvəlində, təkərlərin yeyilməsini qiymətləndirdikdən sonra qərar qəbul ediblər. Şumaher, Rikkardo, Qrojan və Kobayaşi Hard tərkibini seçiblər, qalan sürücülər isə starta Soft-la çıxıblar.

Startda Fettel poulun üstünlüyünü saxlayıb. Uebebrin arxasında isə Batton, Həmilton və Alonso ciddi mübarizəyə girişiblər, bir neçə mövqe dəyişikliyindən sonra Censon Alonso və Lyuisin önündə qala bilib. Şumaher və Vern təmas yaşayıblar və hər iki sürücü boksa yollanıb. 2-ci dövrədən sonra ilk onluq: Fettel – Uebber – Batton – Alonso – Həmilton – Massa- Rəykkönen – Peres – Hülkenberq – Rosberq.

Peleton uzanıb. 14-cü dövrədə Hülkenberq təkərləri yeyilmiş Peresi qabaqlayıb və Serxio boksa yönəlib. 16-cı dövrədə Qrojan Maldonadonu keçərək onluğa daxil olub – Senna da komanda yoldaşını qabaqlayıb. 19-cu dövrədə Rikkardo ilə mübarizədə Peresin maşınında təkər deşilib və meksikalı sürücü bir daha mexaniklərinə baş çəkməli olub. Bir neçə dövrədən sonra isə mübarizəni tam dayandırıb. 22-ci dövrədə isə Qrojan Rosberqi keçərək 9-cu yerə yüksəlib.

25-ci dövrədə Batton, 26-cı dövrədə Senna, 27-ci dövrədə Rəykkönen, Rosberq, Maldonado və Rikkardo, 28-ci dövrədə Massa və Hülkenberq pit-stoplarını reallaşdırıblar. Felipe trasa Rəykkönenin bərabərində qayıdıb və Kimi öndə qala bilib, amma düzlükdə F2012 sürətli olduğu üçün Massa mövqeyini geri qatara bilib. 29-cu dövrədə Alonso, 30-cu dövrədə Uebber mexaniklərinə qonaq olublar. Maldonadonun maşınında Kobayaşi ilə mübarizədə təkər deşilib və venesuelalı sürücü boksa tələsib. 32-ci dövrədə Həmilton, 33-cü dövrədə Fettel, 36-cı dövrədə isə Qrojan və Kobayaşi ilk və yeganə pit-stoplarını gerçəkləşdiriblər. 37-ci dövrədə ilk onluq: Fettel – Uebber – Alonso – Həmilton – Batton – Massa – Rəykkönen – Hülkenberq – Qrojan – Rosberq.

45-ci dövrədə Pedro de la Rosanın maşınında əyləclər imtina edib, 4-cü döngədə sürücü trasdan çıxıb. 47-ci dövrədə Alonso maşınında KERS imtina etmiş Uebebri keçərək ikinciliyə yüksəlib. 56-cı dövrədə Şumaher maşınını boksda saxlayıb, Senna isə Rosberqi keçərək onluğa daxil olub.

Fettel ardıcıl dördüncü inamlı qələbəsini qazanıb və çempionatda Alonso üzərində üstünlüyünü 13 xala çatdırıb. Gələn həftə Abu Dabidə bizi daha bir maraqlı yarış gözləyir!

Sürətli dövrə: Censon Batton (McLaren) – 1:28.203 (60-cı dövrə).

Turnir cədvəli:

Quru. Buludlu. Havanın temperaturu +21° C, trasın temperaturu +25° C

Hindistan trasının konfiqurasiyasının hazırlanması zamanı German Tilke komandalarla məsləhətləşmişdi ki, trasda ötmək üçün maksimum imkan olsun, FİA isə DRS-dən istifadə üçün iki ötmə zonası təyin etmişdi, amma startdan əvvəl sürücülər vəziyyəti ehtiyatla şərh ediblər. Asfaltda qum və toz kifayət qədər olub, ona görə də trayektoriyadan ötmək üçün çıxmaq sürətin azalmasına səbəb olurdu.

Beş sürücü startda yer itirməklə cərimə olunmuşdu. Vitaliy Petrov koreya Mixael Şumaherlə toqquşmaya görə 5 yer, Narain Kartikeyan dünən sıralanma turunda yeddiqat dünya çempionunu bolka saldığına görə 5 yer, Lyuis Həmilton və Serxio Peres cümə günü sarı bayraqlara məhəl qoymadıqlarına görə 3 yer, Daniel Rikkardo isə maşınında ötürmələr qutusu dəyişdirildiyi üçün 5 yer itirməklə cərimə olunmuşdular.

Starta 15 dəqiqə qalmı Dən Ueldon və Marko Simonçellinin xatirələri bir dəqiqəlik sükutla yad edilib.

Startda Fettel poulunu üstünlüyünü qoruyub saxlayıb, bir neçə döngədən sonra Batton Uebberi keçib, Şumaher 3 mövqe qazanıb. Peletonun sonunda Barrikello, Kobayaşi və Qlokun iştirakı ilə insident baş verib: Kamui mübarizədən kənar qalıb, bir az sonra Qlok da mübarizəni dayandırıb.

9-cu dövrədə Algersuari Sennanı keçərək onuncu yerə yüksəlib, komanda yoldaşından geri qalamayan Buemi də Sennanı keçib. 14-cü dövrədə Maldonadonun maşınında motor sıradan çıxıb. 15-ci dövrədə Buemi Sutili keçərək onuncu yerə yüksəlib və Adrian boksa tələsib.

17-ci dövrədə Uebber, Alonso və Həmilton təkərlərini dəyişiblər, 18-ci dövrədə Massa və Rosberq, 19-cu dövrədə Batton, Şumaher və Buemi, 20-ci dövrədə isə yarışın lideri Sebastyan Fettel ilk pit-stop reallaşdırıblar -S ebastyan liderliyini saxlayıb.

24-cü dövrədə Həmilton və Massa beşinci döngədə mövqe uğrunda mübarizədə toqquşublar, Lyuis yeni burun elementi üçün boksa tələsib. Stüardlar insidentdə Massanı günahkar bilərək pit-leyndən keçməklə cərimələyiblər. 26-cı dövrədə Bueminin maşınında motor sıradan çıxıb.

31-ci dövrədə Həmilton Algersuarini səkkizinic yer uğrunda mübarizdə qabaqlayıb. 32-ci dövrədə Massa pit-stopda Hard təkərlərlə trasa qayıdıb, amma iki dövrədən sonra asılqanı dağıldığı üçün mübarizəni dayandırıb.

38-ci dövrədə Uebber 40-cı dövrədə isə Alonso hard təkərlərinə keçiblər – ispaniyalı sürücü trasa rəqibinin önündə çıxa bilib. 46-cı dövrədə Rosberq, Batton və Həmilton, 47-ci dövrədə Algersuari və Fettel təkərlərini dəyişiblər. Sebastyan liderliyini saxlayıb. 51-ci dövrədə Şumaher son pit-stopunu keçirib və trasa komanda yoldaşı Rosberqin önündə qayıdıb.

Yarışın son dövrələrində Red Bull sürücüləri sürətli dövrələrlə növbələşiblər, amma sonda Sebastyan sürətli olub və Böyük Dəbilqə qazanıb: poul, startdan finişə qədər liderlik, sürətli dövrə və qələbə – mövsümdə 11-ci və karyerasında 21-ci.

McLaren komandası Mühəndislər Kubokunda ikinci yeri özünə təmin edib, şəxsi hesabda ikinci yer uğrunda mübarizə isə iki həfət sonra Abu Dabidə davam edəcək…

Sürətli dövrə: Sebastyan Fettel (Red Bull) – 1:27.249(60-cı dövrə).

Turnir cədvəli: