F-1.az xəbər verir ki, keçmiş Red Bull, Ferrari və Aston Martin sürücüsü Qudvuddakı şəxsi kolleksiyasından bir neçə maşını, o cümlədən Naycel Mansellin çempionluq qazandığı Williams FW14B və Ayrton Sennanın 1993-cü ildə yarışdığı McLaren MP4/8 maşınlarını sürəcək. Fettelin kolleksiyasından olan digər avtomobillər Festivalın padokunda nümayiş etdiriləcək.
Sebastyan iyulun 15 və 16-da keçirəcəyi yarışlara əlavə olaraq, yarış sənayesində alternativ yanacaq növlərinin təşviqi sahəsində gördüyü işlərdən danışacaq.
Sebastyan Fettel: “Uzun illərdən sonra Qudvuda qayıtmaq əladır. Mən Qudvudda bu həftə sonu davamlı yanacaqla doldurulacaq bəzi görkəmli avtomobillərin sükanı arxasına keçmək üçün səbirsizlənirəm.
Yarış mənim ehtirasımdır, ona görə də bu gün və gələcəkdə ikonik yarış avtomobillərini idarə etməkdən həzz almağa davam etməyimiz mənim üçün vacibdir, eyni zamanda bunu məsuliyyətlə edirik”.
