F-1.az xəbər verir ki, ikiqat dünya çempionu Formula1-dən ayrıla biləcəyinə bir neçə dəfə eyham vurub və son müsahibəsində qalmağa hazır olduğu şərtləri açıqlayıb.
Maks Ferstappen: “Uzun və gərgin mövsümdən sonra heç nə etməmək və dincəlmək çox xoşdur. İstirahət bir müddət stress keçirməyən bədənə fayda verəcək. Miladdan sonra Kelli ilə tətilə gedəcəyik və qayıtdıqdan sonra bütün diqqətimi qarşıdan gələn mövsümə yönəldəcəyəm.
Daimi uçuşlar sağlamlığa zərərlidir, amma indiyə qədər hər şeyi bəyənirəm, ona görə də belə qurbanlar verməyə hazıram. Sözlərim absurd görünə bilər, çünki çoxları Formula1 bolidini idarə etmək arzusundadır, lakin siz daim evdən və yaxınlarınızdan uzaqda olanda bir gün elə an gələcək ki, bəsdir deyəcəksiniz. Müqavilənin sonuna qədər əlimdən gələni etməyə davam edəcəyəm. Əgər o vaxta qədər mən hələ də eyni pula yarışmaqdan eyni həzzi alacağamsa, o zaman daha bir-iki il davam edəcəyəm – əks halda başqa bir işlə məşğul olacağam.
Ümid edirəm ki, mənim nəticələrim niderlandlı sürücülərin yeni nəslini ruhlandırdı və mən təqaüdə çıxana qədər ölkəmizdə yeni istedadlar olacaq. Əvvəllər deyirdilər ki, niderlandlar Formula1-ə gələ bilməzlər, lakin bu, doğru deyil. Sürətlisənsə, haradan olmağın fərqi yoxdur. Ümid edirəm ki, 31 yaşım tamam olanda mənim üçün əvəzedici hazır olacaq”.
Maks Ferstappen artıq uşaqları düşündüyünü deyib: “Bir gün mütləq uşaq sahibi olmaq istəyirəm. Yarışmaq istəsələr, bu, mənim üçün problem olmayacaq, amma valideynlərimin məni avtoidmanına yönəldəndə etdiklərini etməyəcəyəm. Uşaqlara nə etmək istədiklərinə qərar verəcəyəm.
Əgər onlar yarışı seçsələr, onların üç-dörd yaşı olanda təməl atmaq üçün orada olmaq mənim üçün vacibdir. İndi mənim övladım yoxdur, ona görə də belə mövzularda danışmaq mənim üçün asandır. Ola bilsin ki, gələcəkdə bu məsələyə münasibətim dəyişsin”.
