Emiliya Romanya-2022: Sıralanma turu

İmolada mövsümdə ilk dəfə sprint yarışı keçiriləcək ki, bu da həftəsonunun proqramında ciddi dəyişikliklərə səbəb olur. Sıralanma turundan əvvəl sadəcə bir sərbəst yürüşlər keçirilir ki, o da yaş asfaltda baş tutub.

F-1.az xatırladır ki, həmin tək sərbəst yürüş sessiyasında Şarl Lekler hamını üstələyib.

Sıralanma turu başlamazdan əvvəl tras quruyub. Lakin slikləri isitmək heç də asan olmayıb və ardıcıl dövrələrə ehtiyac duyulub.

İlk Sessiyada Fettel, Alonso, Stroll, Çjou, Okon və Bottas yumşaq təkərlərlə, yerdə qalan sürücülər isə keçid təkərlərlə trasa çıxıblar. Daha sonra hamı quru təkərlərinə keçib. Elbonun arxa sağ əyləci mexaniklərin səhvinə görə çox qızıb və alışıb. Qırmızı bayraqlar dalğalanıb. Sürücü maşını boksa çatdırıb və mübarizədən çəkilib. Marşallar yanan parçaları yığışdırıb, 10 dəqiqəlik fasilədən sonra yaşıl işıqlar yanıb. Latifi yerində fırlanıb. Trasın vəziyyəti getdikcə düzəlib və əsas nəticələr son dəqiqələrdə gəlib. 1:18.796-lıq dövrə Lekleri lider edib, Elbonla yanaşı, Okon, Latifi, Qasli və Tsunoda son beşlikdə qərarlaşıblar.

İkinci Sessiyada səma buludla örtülüb və hamı trasa çıxmaq üçün tələsib. Yenə qırmızı bayraqlar peyda olub – Sayns 18-ci döngədə qəza edib və mübarizə onun üçün də erkən başa çatıb. Fasilə 10 dəqiqə davam edib. Yağış yağmağa başlayıb. Əksər sürücülər bokslarda qalmağa üstünlük veriblər. Bir neçə sürücü keçid təkərlərlə trasa çıxsa da, nəticələri inkişaf etdirə bilməyib. Ferstappen 1:18.793 ilə ən yaxşı nəticəyə sahib olub, Stroll, Çjou, Həmilton, Şumaxer və Rassell həlledici mərhələyə keçə bilməyib.

Son sessiyada hamı keçid təkərləri ilə trasa çıxıb. Ferstappen trasdan çıxıb, lakin yoluna davam edə bilib. Hər kəs sürətli dövrəsində olarkən çınqıllığa düşən Maqnussen növbəti qırmızı bayraqlara səbəb olub. O trasa qayıdıb və maşını boksa çatdırıb, buna görə də, fasilə qısa olub. Alonso ilk sektorda ən yaxşı nəticə ilə getsə də, ikinci sektorda səhvə yol verib. Qırmızı bayraqları dördüncü dəfə dalğalandıran isə Valtteri Bottas olub. Onun maşınının təxliyəsi 14 dəqiqə çəkib. Bundan əvvə isə Ferstappen günün ən həlledici dövrəsini vurub – 1:27.999. Yaşıl bayraqlardan sonra hamının yalnız bir cəhd üçün vaxtı olub, lakin heç kim nəticəsini yaxşılaşdıra bilməyib. Norrisin sonlara yaxın 13-cü döngədəki qəzasından sonra sıralanma turunun davam etdirilməməsinə qərar verilib.

Beləliklə, Maks Ferstappen mövsümdə ilk, karyerasında isə 14-cü poulunu qazanıb. İkinci yeri Şarl Lekler, üçüncü yeri isə Lando Norris tutub. Kevin Maqnussenin dördüncülüyü isə Haas komandasının tarixində ən yaxşı sıralanma turu nəticəsidir. Lakin unutmayaq ki, bazar günü baş tutacaq əsas yarışın start düzümünü sabahkı sprint yarışı müəyyən edəcək…

Yer	N	Sürücü	Komanda	1-ci sessiya			2-ci sessiya			3-cü sessiya
Yer	N	Sürücü	Komanda	Yer	Zaman	Dövrə	Yer	Zaman	Dövrə	Zaman	Dövrə
1	1	Maks Ferstappen	Red Bull	2	1:19.295	11	1	1:18.793	3	1:27.999	8
2	16	Şarl Lekler	Ferrari	1	1:18.796	10	5	1:19.584	4	1:28.778	8
3	4	Lando Norris	McLaren	8	1:20.168	10	3	1:19.294	5	1:29.131	7
4	5	Kevin Maqnussen	Haas	7	1:20.147	11	7	1:19.902	3	1:29.164	7
5	14	Fernando Alonso	Alpine	9	1:20.198	12	6	1:19.595	6	1:29.202	8
6	3	Daniel Rikkardo	McLaren	6	1:19.980	11	9	1:20.031	3	1:29.742	7
7	11	Serxio Peres	Red Bull	5	1:19.773	12	4	1:19.296	5	1:29.808	8
8	77	Valtteri Bottas	Alfa Romeo	13	1:20.419	13	10	1:20.192	5	1:30.439	5
9	5	Sebastyan Fettel	Aston Martin	11	1:20.364	12	8	1:19.957	6	1:31.062	7
10	55	Karlos Sayns	Ferrari	3	1:19.305	10	2	1:18.990	3	–	0
11	63	Corc Rassell	Mercedes	12	1:20.383	13	11	1:20.757	3
12	47	Mik Şumaxer	Haas	14	1:20.422	13	12	1:20.916	3
13	44	Lyuis Həmilton	Mercedes	15	1:20.470	12	13	1:21.138	3
14	24	Quanyu Çjou	Alfa Romeo	4	1:19.730	13	14	1:21.434	3
15	18	Ləns Stroll	Aston Martin	10	1:20.342	11	15	1:28.119	3
16	22	Yuki Tsunoda	AlphaTauri	16	1:20.474	11
17	10	Pyer Qasli	AlphaTauri	17	1:20.732	11
18	6	Nikolas Latifi	Williams	18	1:21.971	13
19	31	Estenan Okon	Alpine	19	1:22.338	9
20	23	Aleksandere Elbon	Williams	20	–	3