Emiliya Romanya-2021: Yarış

F-1.az xatırladır ki, cümə günü baş tutan hər iki məşqdə Bottas hamıdan sürətli olub, dünənki məşq sessiyasında isə Ferstappen öz adını birinci yerə yazdırıb. Sıralanma turu kifayət qədər maraqlı və sıx mübarizəyə səhnə olub, Həmilton cüzi üstünlüklə 99-cu poulunu rəsmiləşdirib.

Pirelli ilk yarışda olduğu kimi, buraya da orta üçlüyü – C2, C3 və C4 təkərlərini gətirib. Sərin havada köhnə asfalt üzərində aşınma az olub, İmolada pit-stop üçün itirilən vaxt kifayət qədər çox, təxmini 30 saniyə hesablanıb. Hər kəs yarışı tək pit-stopla başa vurmağı planlaşdırsa da, yağış bu planın üzərindən xətt çəkib.

Yarışa ilk cərgədən Həmilton və Peres, ikinci cərgədən Ferstappen və Lekler, üçüncü cərgədən Qasli və Rikkardo başlayıblar. İsinmə dövrəsində Alonso qəza edib, lakin startda öz yerini ala bilib. Arxa əyləclərdə problemlə qarşılaşan Fettel isə yarışa pit yolundan başlamalı olub. Lakin təkərləri vaxtında taxılmadığı üçün yarışın gedişində 10 saniyəlik Stop&Go cəzası alıb.

Qasli Okon, Şumaxer və Mazepin yağış, yerdə qalan sürücülər isə keçid təkərləri ilə yarışa başlayıblar.

Startda Ferstappen həm Peresi, həm də Həmiltonu qabaqlayaraq liderliyə yüksəlib. Lyuisin ön qanadı zədələnib, 14-cü döngəyə çatdıqda isə Lekler Peresi keçərək üçüncü olub. Latifi qəza edib və Təhlükəsizlik Maşını (TM) trasa daxil olub. Yağış təkərləri ilə xeyli itirən Qasli dərhal keçid təkərləri üçün pitə gəlib. 2-ci dövrədən sonra ilk onluq: Ferstappen – Həmilton – Lekler – Peres – Rikkardo – Qasli – Stroll – Sayns – Norris – Bottas.

Fettel 3-cü dövrədə təkərlərini dəyişib, Şumaxer pit yolunun çıxışnda qəza edib və ön qanadını itirib. Qırıntılara görə pit yoluna giriş bağlanıb və Mik yalnız növbəti dövrədə qanadını dəyişdirə bilib. Peres yoldan çıxaraq iki yer itirib, lakin dərhal yerini bərpa edib və buna görə də 10 saniyəlik cəza alıb.

Restart 6-cı dövrədə verilib. Lyuis Maksa hücuma cəhd etsə də, alınmayıb. Niderlandlı sürücü sürətlə uzaqlaşıb. Həmilton isə Leklerin həmlələrinə cavab verməli olub. Sayns iki mövqe qazanıb. Qasli Norrisi üstələyib, lakin Lando yerini qaytarıb. Qaslini bir qədər sonra Sayns da geridə qoyub.

Alosno Okon və Fetteli irəli buraxmalı olub, Sayns çınqıllığa çıxsa da, qayıda bilib. Stroll Qaslini üstələyib. Yağış dayanıb və tras qurumağa başlayıb. Daha yaxşı templə davam edən Norris komanda yoldaşı Rikkardoya çatıb, ondan mövqelərini dəyişmələrini xahiş ediblər və Daniel bunu müsbət qarşılayıb. Norris irəli keçdikdən sonra sürətlə ondan uzaqlaşıb.

Sliklərə keşən ilk sürücü 22-ci dövrədə Fettel olub, Şumaxer də bir dövrə sonra eyni addımı atıb. 24-cü dövrədən sonra ilk onluq: Ferstappen – Həmilton – Lekler – Peres – Norris – Rikkardo – Sayns – Stroll – Bottas – Rassell.

Fettel cəriməsini ödəmək üçün boksa gəlib, Sayns Rikkardonu qabaqlayıb. 27-ci dövrədə Tsunoda, Rassel və Rəykkönenlə yanaşı, yarışın lideri Ferstappen də təkərlərini dəyişib. Həmilton isə tempini artırıb və növbəti dövrədə pit-stop edib. Onunla eyni vaxtda Qasli, Sayns, Rikkardo, Stroll, Lekler, Peres və Norris də yeni təkərlərə keçiblər. Lyuis pitdə bir qədər gecikdirilib. Bottas və Alonso da təkərlərini dəyişib və beləliklə, bütün sürücülər sliklərə keçib.

DRS aktiv ediləndən dərhal sonra Stroll Bottası ötüb. 31-dövrədə Həmilton dövrəvi sürücü olan Rasselli keçmək istəyərkən səhvə yol verib və çınqıllığa düşüb, həm də ön qanadı qırılıb. Lakin maşını trasa qaytara bilib. Məhz bu anda Bottas və ona hücum edən Rassellin təması ciddi qəzaya səbəb olub. Sonradan yarışi insidenti kimi dəyərləndirilən qəza TM-nın trasa çıxmasına səbəb olub. Qırıntılar çox olduğundan, yarış 33-cü dövrədə qırmızı bayraqlarla dayandırılıb.

Restart yarım saat sonra verilib və TM arxasında baş tutub. Dövrəvi sürücülər irəli buraxılıb və bu da Lyuis üçün böyük şans olub. Ferstappen və Rəykkönen yerində fırlanıblar. Maks mövqeyini qoruya bilib. Lakin iki yer itirən Kimi yerini vaxtından əvvəl qaytardığı üçün sonradan 30 saniyəlik cəza verilib.

Ferstappen restartda yerini qoruyub, Norris isə Lekleri keçərək ikinciliyə yüksəlib. Peres çınqıllığa çıxıb. Maşın zədələnməsə də, bu səhv ona bir neçə yer itirməkl bahasına başa gəlib. Həmilton Strollu üstələyərək altıncı olub. 42-ci dövrədə isə Rikkardo ilə beşincilik mübarizəsindən qalib ayrılıb. Qasli 45-ci dövrədə Rəykköneni geridə qoyub və 8-ci olub. İki dövrə sonra Həmiltonun növbəti “qurbanı” Sayns olub. Lyuisin yüksəlişi davam edib və Lekleri də ötüb.

Qasli çınqıllığa çıxsa da, yarışa davam edə bilib. Lyuis gözlənildiyi kimi, Norrisi də geridə qoyub və qırmızı bayraqlardan sonra mümkün olanın maksimumunu edərək ikinciliyə qalxıb. Fettelə ötürmələr qutusundakı problemə görə yarışı dayandırmaq tapşırılıb.

Maks Ferstappen bu mövsüm ilk, karyerasında isə 11-ci qələbəsini əldə edib. Lyuis Həmilton ikinci olmaqla yanaşı, ən sürətli dövrəni də vurub və bunun nəticəsində qazandığı əlavə 1 xalla çempionatdakı liderliyini davam etdirib. Lando Norris karyerasında ikinci dəfə podiuma yüksəlib.

Çempionat 2 həftə sonra Portimaoda davam edəcək…

* – Trasın hüdudlarını pozduğu üçün nəticəsinə 5 saniyə əlavə edilib.

** – Trasın xaricindən ötmə etdiyi üçün nəticəsinə 5 saniyə əlavə edilib.

*** – Restart prosedurlarını pozduğu üçün nəticəsinə 30 saniyə əlavə edilib.

Sürətli dövrə: Lyuis Həmilton (Mercedes) – 1:16.702 (60-cı dövrə, 230.403 km/s)

MÜBARİZƏNİ DAYANDIRANLAR:

SÜRÜCÜLƏRİN ÇEMPİONATI:

Yer	N	Sürücü	Ölkə	Komanda	Xal
1	44	Lyuis Həmilton		Mercedes-AMG Petronas F1 Team	44
2	33	Maks Ferstappen		Red Bull Racing	43
3	4	Lando Norris		McLaren Racing	27
4	16	Şarl Lekler		Scuderia Ferrari Mission Winnow	20
5	77	Valtteri Bottas		Mercedes-AMG Petronas F1 Team	16
6	55	Karlos Sayns		Scuderia Ferrari Mission Winnow	14
7	3	Daniel Rikkardo		McLaren Racing	14
8	11	Serxio Peres		Red Bull Racing	10
9	10	Pyer Qasli		Scuderia AlphaTauri Honda	6
10	18	Ləns Stroll		Aston Martin Cognizant F1 Team	5
11	22	Yuki Tsunoda		Scuderia AlphaTauri Honda	2
12	31	Esteban Okon		Alpine F1 Team	2
13	14	Fernando Alonso		Alpine F1 Team	1

MÜHƏNDİSLƏR KUBOKU: