San Paulu-2022: Sprint yarışı

F-1.az xatırladır ki, dünən baş tutan ilk sərbəst yürüşlərdə Serxio Peres hamıdan üstün olub. Dəyişkən hava şəraitinin damğa vurduğu sıralanma turunda isə heç kimin gözləmədiyi halda Kevin Maqnussen həm özünə, həm də komandası Haas-a ilk poulunu qazandırıb. Çox əhəmiyyət daşımayan bugünkü məşqlərə isə Esteban Okon liderlik edib.

Start düzümündə Maqnussen və Ferstappen birinci, Rassell və Norris ikinci, Sayns və Okon isə üçüncü cərgədə qərarlaşıblar.

Pirelli buraya orta üçlüyü – Hard, Medium və Soft rolunda C2, C3 və C4 tərkiblərini gətirib. 24 dövrəlik qısa yarış üçün Ferstappen və Latifi Medium təkərləri seçiblər, qalanları isə Soft-larla başlayıb.

Startda Maqnussen yerini qoruya bilib, Sayns Norrisi, Həmilton isə Alonsonu qabaqlayıb. Sonuncu yerdən başlayan Şumaxer 4 pillə irəliləyib. Alonso komanda yoldaşı ilə təmasda ön qanadını itirib və geriləyib. Daha sonra da pit-stop edib. 2-ci dövrədə ilk onluq: Maqnussen – Ferstappen – Rassell – Sayns – Norris – Okon – Həmilton – Peres – Lekler – Qasli.

Üçüncü dövrədə Həmilton Okonu keçib, Ferstappen də Maqnusseni geridə qoyaraq liderliyə yüksəlib. Bir dövrə sonra danimarkalı sürücü Rassell və Saynsdan da geri qalıb. Həmilton növbəti iki dövrədə Norris və Maqnusseni üstələyib. Qasli də Okonla mübarizədən qalib ayrılıb. Norris və Maqnussen 9-cu dövrədə Peres tərəfindən keçiliblər.

10-cu dövrədə Fettel bir neçə cəhddən sonra Strollu keçib. Cəhdlərdən birincisində mövqeyini qoruyan Ləns Sebastyanı trasdan çıxarıb və stüardlardan on saniyəlik cəza alıb. 10-cu dövrədə ilk onluq: Ferstappen – Rassell – Sayns – Həmilton – Peres – Maqnussen – Norris – Lekler – Qasli – Okon.

Rikkardo Stroll, Fettel Okonu ötüb. Rassell 12-ci dövrədən Maksa hücumlar etməyə başlayıb, lakin cari çempion mövqeyini qoruyub. Növbəti dövrədəki cəhdlər də nəticə verməyib. Elbon texniki problemlərə görə yarışı tərk edib, sürücülər bir müddət sarı bayraqlar altında sürməli olublar.

Rikkardo Okonu arxada qoyub, Rassell isə nəhayət, Ferstappeni keçərək yarışa liderlik edib. Lekler də Maqnusseni keçib. Medium təkərlərlə tempi aşağı olan Maks ilə fərqi sürətlə bağlayan Sayns ona çatıb və 19-cu dövrədə onu keçib. İkilinin arasındakı təmas niderlandlı sürücünün ön qanadının qırılması ilə nəticələnib.

Bir qədər sonra Həmilton da Maksı keçib. Norrisə uduzan Maqnussen daha bir pillə geri düşüb. 20-ci dövrədə ilk onluq: Rassell – Sayns – Həmilton – Ferstappen – Peres – Lekler – Norris – Maqnussen – Qasli – Fettel.

Fettel Qaslini üstələyib. Tsunoda Okonu, bir qədər sonra isə Alonso hər ikisini geridə qoyub.

Corc Rassell karyerasında ilk dəfə sprint yarışda qalib gəlib və sabahkı yarışa ən öndən başlayacaq. İkinci yeri tutan Karlos Sayns startda 5 yer itirəcəyi üçün ilk cərgəni Mercedes sürücüləri zəbt edəcək. Təbii ki, start prosedurunu pozduğu deyilən Lyuis Həmiltona cəza gəlməzsə.

Sabah bizi möhtəşəm yarış gözləyir.

* – Fettellə ilə insidentə görə Strollun nəticəsinə 10 saniyə əlavə edilib.

Sürətli dövrə: Corc Rassell (Mercedes) – 1:14.233 (4-cü dövrə, 193.310 km/s)

MÜBARİZƏNİ DAYANDIRANLAR:

SÜRÜCÜLƏRİN ÇEMPİONATI:

Yer	N	Sürücü	Ölkə	Komanda	Xal
1	1	Maks Ferstappen		Red Bull Racing	421
2	11	Serxio Peres		Red Bull Racing	284
3	16	Şarl Lekler		Scuderia Ferrari	278
4	63	Corc Rassell		Mercedes-AMG Petronas F1 Team	239
5	44	Lyuis Həmilton		Mercedes-AMG Petronas F1 Team	222
6	55	Karlos Sayns		Scuderia Ferrari	219
7	4	Lando Norris		McLaren Racing	113
8	31	Esteban Okon		Alpine F1 Team	82
9	14	Fernando Alonso		Alpine F1 Team	71
10	77	Valtteri Bottas		Alfa Romeo F1 Team ORLEN	47
11	5	Sebastyan Fettel		Aston Martin Aramco Cognizant F1 Team	36
12	3	Daniel Rikkardo		McLaren Racing	35
13	20	Kevin Maqnussen		Haas F1 Team	25
14	10	Pyer Qasli		Scuderia AlphaTauri	23
15	18	Ləns Stroll		Aston Martin Aramco Cognizant F1 Team	13
16	47	Mik Şumaxer		Haas F1 Team	12
17	22	Yuki Tsunoda		Scuderia AlphaTauri	12
18	24	Quanyu Çjou		Alfa Romeo F1 Team ORLEN	6
19	23	Aleksander Elbon		Williams Racing	4
20	6	Nikolas Latifi		Williams Racing	2
21	34	Nik de Vriz		Williams Racing	2

MÜHƏNDİSLƏR KUBOKU: