F-1.az bildirir ki, testlərdə ən böyük çətinliklər Haas komandasının payına düşüb – yeni komanda həm ilk maşınını trasda test etməliydi, həm kollektivdə qarşılıqlı münasibətləri tənzimləməli və formalaşdırmalı idi. Komandanın sahibi Cin Haas hətta etiraf etdi ki, “Formula1-in belə çətin olmasını bilmirmiş”, mətbuat bu ifadəni göydə qapdı…
İki il əvvəl hətta top-komandalarda güc qurğusunun dəyişdirilməsi böyük vaxt itkisi idi, artıq onlar bu prosesə daha az vaxt sərf edirlər, Haas komandası həmin dövrü daha qısa müddətdə keçməlidir. Yeni komanda gözlənildiyi kimi qət edilən məsafə üzrə sonuncu yeri tutub.
Manor komandası son illərdə birinci dəfə yeni maşınla ilk testlərə qatılıb. Yeni rəhbərlik və yeni sürücülərlə, və ən əsası – yeni maşın və yeni Mercedes motoru ilə komanda qarşıdakı mövsümə çox nikbin köklənib. Qət olunan məsafə yeni maşının etibarlı olmasından xəbər verir, hər şey onun mövsümün gedişində tərəqqisindən asılı olacaq. Bu il peletonun quyruğunda da sıx mübarizə gözlənilir.
Sauber komandası isə ilk testlərə keçənilki maşınla qatılmışdı, bu həftə isə yeni maşının debütü ürəkaçan alınmayıb – komanda dörd gün ərzində etibarlılıq problemlərindən tam azad ola bilməyib, komanda qrafikdən hissolunacaq dərəcədə geri qalır.
Yeni zavod komandası Renault testlərə keçənilki Lotus-un builki reqlamentə adaptasiya olunmuş versiyası ilə qatılıb – maşında güc qurğusu da dəyişib. İlk testlər problemlər üzə çıxsa da, bu həftə komanda məhsuldar işləyə bilib. Maraqlıdır ki, Maqnussen gənc həmkarı Palmerdən iki dəfə çox məsafə qət edib.
Toro Rosso komandası da motor təchizatçısını dəyişib, həm də bu barədə məlumatı yalnız keçən ilin sonunda almışdı. Komanda keçənilki Ferrari motorunu yeni şassiyə inteqrasiya etməli olub. Komandanın sürücüləri bu həftə qət olunan məsafə üzrə liderlik ediblər və ana komandanı qat-qat qabaqlayıblar.
Honda motorçuları keçənilki testlərlə müqayisədə bu il müqayisəolunmaz dərəcədə inkişaf ediblər. Motor həddindən çox etibarlı alınsa da, testlər maşının sürəti barədə fikir söyləməyə imkan verməyib. Komanda özü də bu məsələdə ehtiyat edərək, bir neçə yarışdan sonra pik nöqtəyə çıxmağa ümid edir.
Red Bull komandası hər gün hər hansı bir problemlə üzləşsə də, ümumilikdə Renault motorları həm etibarlı, həm də sürətli təsir bağışlayıblar. Maşının real sürətini ancaq Melburnda sıralanma turunda görəcəyik.
Williams və Force İndia testləri çox inamla keçiriblər, ciddi problemlərlə üzləşməyiblər, stabil nəzərdə tutulan proqram üzrə işləyiblər. Qeyd edək ki, testlərdə Force İndia test sürücüsü ilə işləyən yeganə komanda olub.
Mercedes AMG komandası ilk günlərin marafon məsafələrindən sonra bu həftə sürücülərini gün ərzində yalnız dörd saat işlədib. Çempion komanda mövsümöncəsi testlərdə ən böyük məsafə qət edən komandadır. Komanda ən yumşaq təkərlərlə işləmədi, əsas üstünlüyü isə Medium tərkibinə verdi. Amma bu gün Lyuis Həmiltonun maşınında ötürmələr qutusunda problemlər üzə çıxıb.
Ferrari komandası isə əsas rəqibindən fərqli olaraq sürətini gizlətməyib – komanda səkkiz gündən beşində protokollara başçılıq edib. Fettel və Rəykkönen UltraSoft və SuperSoft tərkiblərlə aktiv işləyiblər, bəlkə də yeni təkər reqlamentinə uyğun mübarizə üsulu tapıblar.
Beləliklə, mövsümöncəsi testlər başa çatıb, iki həftədən sonra biz mövsümün ilk Qran Prisində olacayıq. Tezliklə görüşəcəyik…
| Yer | N | Sürücü | Komanda | Maşın | Zaman | Fərq | Dövrə | Təkər |
| 1 | 5 | Sebastyan Fettel | Ferrari | SF16-H | 1:22.852 | – | 142 | SuperSoft |
| 2 | 55 | Karlos Sains | Toro Rosso | STR11 | 1:23.134 | + 0:00.282 | 132 | UltraSoft |
| 3 | 19 | Felipe Massa | Williams | FW38 | 1:23.644 | + 0:00.792 | 129 | SuperSoft |
| 4 | 11 | Serxio Peres | Force İndia | VJM09 | 1:23.721 | + 0:00.869 | 60 | SuperSoft |
| 5 | 44 | Lyuis Həmilton | Mercedes AMG | W07 | 1:24.133 | + 0:01.281 | 69 | Medium |
| 6 | 3 | Daniel Rikkardo | Red Bull | RB12 | 1:24.427 | + 0:01.575 | 123 | Soft |
| 7 | 22 | Censon Batton | McLaren | MP4-31 | 1:24.714 | + 0:01.862 | 121 | UltraSoft |
| 8 | 30 | Colion Palmer | Renault | RS16 | 1:24.859 | + 0:02.007 | 90 | SuperSoft |
| 9 | 9 | Markus Eriksson | Sauber | C35 | 1:25.031 | + 0:02.179 | 132 | Soft |
| 10 | 8 | Roman Qrojan | Haas | VF-16 | 1:25.255 | + 0:02.403 | 66 | Soft |
| 11 | 21 | Esteban Qutyerres | Haas | VF-16 | 1:25.422 | + 0:02.570 | 25 | SuperSoft |
| 12 | 88 | Rio Haryanto | Manor | MRT05 | 1:25.899 | + 0:03.047 | 58 | UltraSoft |
| 13 | 6 | Niko Rosberq | Mercedes AMG | W07 | 1:26.140 | + 0:03.288 | 69 | Medium |
