F-1.az bizim yarışı izləmək üçün azarkeşləri maraqlandıran 7 əsas səbəbi bir araya toplayıb. Gəlin onları nəzərdən keçirək…
- Sıralanma turu: Həmiltondan 66-cı poul?
Kanadada Lyuis Həmilton karyerasında 65-ci poulunu qazanmaqla əfsanəvi Ayrton Senna ilə bərabərləşdi. Bakıda isə britaniyalı sürücünün ikinciliyə yüksəlmək şansı olacaq. Əgər Lyuis şənbə günü hamını üstələsə, onda Mixael Şumaxerə cəmi iki poul qalacaq.
Tarix gözümüzün önündə yazılır, bu tarixi izləmək istəmirsiniz?
- Yarış: Ferrari yoxsa Mercedes?
Bir ay əvvəl başqa bir şəhər tipli trasda baş tutmuş yarış qırmızıların xeyrinə qurtarmışdı. Fettelin inamlı qələbəsini Rəykkönen ikinci yerlə möhkəmlətmişdi. Komanda 7 illik dubl həsrətinə son qoymaqla knyazlığın küçələrində 16 illik qələbə həsrətini bitirmişdi. Hələ yarışdan əvvəl hamı deyirdi ki, Mercedes-in cari mövsüm üçün hazırladığı W08 şassisi uzun təkər bazasına malik olduğu üçün Monakonun küçələrində effektiv olmayacaq. Amma komanda sərbəst yürüşlərdəki uğursuzluğu sazlanmaların düzgün seçilməməsi ilə əlaqələndirsə də, sıralanma turunda da Ferrari-dən geri qalmışdılar.
Bakıda Mercedes sürücüləri Monakoda olduğu kimi geridə olmayacaqlar, çünki knyazlıqdan fərqli olaraq bizim trasda uzunluğu 2.2 km olan uzun bir düzlük var. Formula1 təqviminin ən uzun düzlüyü keçən il olduğu kimi, bu il də Mercedes motorları üçün əlverişli olacaq. Ona görə də bu dəfə poul və qələbə uğrunda mübarizə daha gərgin olacaq.
- Yarış: Fettel yoxsa Həmilton?
Bizim yarışa qədər hər iki sürücünün aktivində 3 qələbə var. Bu il heç bir sürücü ardıcıl 2 qələbə qazanmayıb. Bunu Bakıda Həmilton edə bilər. Amma Fettel də Kanada uğursuzluğunun əvəzini çıxmağa, eləcə də qırılmış podium seriyasının yenisini başlamağa cəhd edəcək. Bəs Həmilton nə ilə cavab verəcək?
Britaniyalı sürücü Monreal qələbəsindən sonra bildirmişdi ki, artıq təkərləri daha yaxşı başa düşür. Bakıda isə daha bərk təkərlərlə yarışacaq. İstənilən halda, dördqat və üçqat dünya çempionlarının mübarizəsi bizim yarışa xüsusi rəng qatacaq. Bu mübarizədən zövq almağa hazırsınız?
- Yarış: McLaren və Alonso xal hesabını açacaqlar?
Monakoda sıralanma turunda hər iki sürücüsü ilə son sessiyaya qalmağı bacaran McLaren komandası eyni ssenariyə sevinə bilər. Amma Kanadada son dövrələrdə yaşanan nasazlıq motor dəyişməsinə səbəb olsa, yarışımızın keçənilki səfiri Fernando Alonso gerilərdən start almalı olacaq.
Amma indi hamını başqa bir sual maraqlandırır: əgər komanda uğurlu strategiya tətbiq edərsə, Alonso ilk onluqda mübarizə aparsa, finişə neçə dövrə qalmış Honda motoru sıradan çıxacaq? McLaren və Honda alyansının ölkəmizdə bəlkə də son yarışına şahidlik eləməyə dəyər.
- Red Bull favoritlərə müqavimət göstərə biləcək?
Aerodinamikanın atası Ədrian Nyuinin hazırladığı RB13 şassisi bu il də mükəmməl alınıb, amma komanda Renault mühərriyinin problemlərindən əziyyət çəkir. Motorçular mövsümün gedişində heç bir yenilik etməyəcəklərini açıqlasalar da, ekspertlər bunu Ferrari və Mercedes-i yayındırmaq gedişi adlandırıblar. Əgər Renault motorçuları bizim yarışa yenilənmiş motor gətirsələr, onda Red Bull da qələbəyə ciddi namizədə çevrilə bilər. Amma, deyəsən, çox şərtli xəyal qurduq.
İstənilən halda, Daniel Rikkardo ardıcıl 3 podium seriyasını davam etdirməyə çalışacaq, Maks Ferstappen isə vəd etdiyi kimi İçəri şəhərə gəzintiyə çıxacaq, əlbəttə, yarışdan sonra…
- Williams-dan yeni rekordlar görəcəyik?
Bir il əvvəl ölkəmizdə baş tutan ilk yarışda britaniyalılar iki rekorda imza atmışdılar. Maşınlardan birinin dörd təkəri cəmi 1.92 saniyəyə dəyişdirilmişdi. Cari mövsümdə təkərlərin daha enli və ağır olması hələ 2 saniyənin altına düşməyə imkan vermir. Son yarışda elə Williams komandası yeni təkərlər üçün 2.17 saniyəlik rekorda imza atıb. Bu nəticəni ölkəmizdə daha da yaxşılaşdırmaq mümkündür.
Neftçilər prospektində isə komandanın keçənilki sürücüsü Valtteri Bottas 366 km/saat sürət yığmışdı. Bu il bunu da təzələmək çətin olacaq. Çünki enli təkərlər həm bərkdirlər, həm də maşınların havaya qarşı müqavimətini artırıblar. Lakin buna baxmayaraq, yeni nəsil maşınlar üçün rekord nəticə əldə eləmək tam mümkündür.
- Hər günün sonunda şou proqramı
Bu ildən Azərbaycan Qran Prisi adlanacaq milli yarışımızın təşkilatçısı Bakı Şəhər Halqası (BŞH) bilet alaraq tribunalara toplaşacaq azarkeşlər üçün möhtəşəm əyləncə proqramları hazırlayıb. Əvvəla, dördgünlük bileti olan tamaşaçılar hələ cümə axşamından pit-leyndə gəzintiyə çıxa biləcəklər. Onlar burada mexaniklərin F1 maşınlarını qarşıdakı sessiyalara necə hazırladıqlarını görəcəklər.
Cümə günü sərbəst yürüşlərdən sonra Tarkan, şənbə günü sıralanma turundan sonra Nikol Şerzinger və The Black Eyed Peas qrupu, bazar günü yarışdan sonra isə Meraya Keri kimi dünya şöhrətli ulduzlar tamaşaçılara unudulmaz anlar yaşadacaqlar.
Ona görə də ölkəmizdə baş tutacaq bu yarışı tribunalardan canlı izləməyə dəyər. Biletlər isə artıq qurtarmaq üzrədir, tələsin!
