Azərbaycan-2021: Yarış

F-1.az xatırladır ki, cümə axşamı baş tutan məşqlərdə Maks Ferstappen və Serxio Peres hamıdan sürətli olublar. Dünənki son məşqlərdə isə Pyer Qasli protokollara başçılıq edib. Sıralanma turu çox maraqlı alınıb, Şarl Lekler ardıcıl ikinci dəfə hadisələrlə sona çatan mərhələni poulla başa vurub.

Pirelli paytaxtımıza ilk dəfə ən yumşaq 3 tərkibi – C3, C4 və C5 təkərlərini gətirib. Lakin bu tərkiblərin belə asfaltla ilişməsi çox zəif olub və maşınların sürüşməsi halları tez-tez baş verib. Rəykkönen, Rassell və Latifi Medium, Stroll Hard, qalan sürücülər isə Soft təkərlərlə yarışa başlayıblar.

Start düzümündə ilk cərgəni Lekler və Həmilton, ikinci cərgəni Ferstappen və Qasli, üçüncü cərgəni isə Sayns və Peres zəbt edib.

Lekler startda yerini qoruyub, Peres Saynsı keçib, bir qədər sonra isə Qasli ona önə keçməsi üçün imkan yaradıb. Alonso Tsunodanı geridə qoyub. 2-ci dövrədən sonra ilk onluq: Lekler – Həmilton – Ferstappen – Peres – Qasli – Sayns – Alonso, Tsunoda, Fettel, Bottas.

Rassell erkən pit-stop edərək Hard təkərlərə keçib. Bir qədər sonra Covinatsi də pit-stop edib. Həmilton 3-cü dövrədə Ferrari-nin yarış tempinin olmamasından yararlanaraq Lekleri geridə qoyub və liderliyə yüksəlib. Okon bir dövrə sonra motor güc itirdiyi üçün yarışdan çəkilməli olub. Tsunoda Alonsoya hücum edərək yerini qaytarıb. Lekleri 7-ci dövrədə Ferstappen, 8-ci dövrədə isə Peres ötüb.

Alonso və Norris 8-ci, Şumaxer 9-cu, Lekler, Tsunoda, Latifi və Mazepin 10-cu, Sayns 11-ci, Həmilton, Qasli, Bottas və Rikkardo 12-ci dövrədə pit-stop ediblər. Lyuis bir qədər ləngidilib. Sayns təhlükəsizlik cibinə girərək sarı bayraqlara səbəb olub, lakin maşına heç bir zərər dəyməyib. Ferstappen 13-cü, Peres isə 14-cü dövrədə təkərlərini dəyişib və Serxio pit-stop zamanı ləngisə də, hər iki sürücü trasa Həmiltonun önündə qayıdıb. Rəykkönen də eyni dövrədə yeni təkərlərə keçib.

Peres Həmiltona hücum şansı verməyib və fərqi artırıb. Rikkardo Alonsonu üstələyərək 11-ci yerə yüksəlib. Fettel nəhayət, 19-cu dövrədə təkərlərini dəyişib. 20-ci dövrədən sonra ilk onluq: Ferstappen – Peres – Həmilton – Stroll – Qasli – Lekler – Fettel – Tsunoda – Norris – Bottas.

Mazepin təhlükəsizlik cibinə girib. Sayns Alonsonu keçərək 12-ci olub. Stroll 31-ci dövrədə düzlükdə arxa sol təkəri deşildiyi üçün qəza edib. Təhlükəsizlik Maşını trasa daxil olub. Pit-leynə giriş bağlanıb və yalnız 34-cü dövrədə açılıb. Alonso, Covinatsi, Rassell və Şumaxer təkərlərini dəyişiblər. Şumaxerə pit-stopdan sonra dayanması əmr edilib, maşını geri qaytarılıb və təkər bərkidildikdən sonra trasa qayıdıb.

Restart 35-ci dövrədə verilib, Fettel, Lekler, Rikkardo, Alonso və Rəykköneni keçərək Bottasa hücum edib, onu da üstələyib. Sebastyan daha sonra Qaslini ötüb, Covinatsi isə Bottası geridə qoyub. 40-cı dövrədən sonra ilk onluq: Ferstappen – Peres – Həmilton – Fettel – Qasli – Lekler – Tsunoda – Norris – Sayns – Rikkardo.

Ferstappen 47-ci dövrədə Strollun qəza etdiyi yerdən bir qədər öndə, onunla eyni səbəb ucbatından – arxa sol təkəri partladığı üçün qəza edib. Əvvəlcə TM maşını trasa çıxıb, daha sonra isə yarış qırmızı bayraqlarla dayandırılıb. Latifi pit yolu əvəzinə, trasdan keçdiyi üçün ona 10 saniyəlik Stop&Go cəzası verilib, Rassell isə güc qurğusundakı problemə görə yarışı saxlamalı olub. Restart yalnız 40 dəqiqə sonra və yerindən start şəklində verilib. Sürücülər son 2 dövrləlik mübarizəyə qoşulublar. Həmilton Peresi arxada qoymaq üçün əyləcə gec basıb, təkərləri bloklayıb və təhlükəsizlik cibinə girərək trasa yalnız 16-cı yerdə qayıda bilib. Alonso 4 yer qazanıb.

Serxio Peres bu mövsüm ilk, karyerasında isə ikinci qələbəsini qazanıb. Bu, Serxionun həm də Red Bull-da ilk zəfəridir. Sebastyan Fettel bu il ilk podiumunu qazanıb, Pyer Qasli isə üçüncü olaraq podiumu tamamlayıb. Mercedes hibrid motorlara keçiddən sonra üçüncü dəfə yarışı xalsız vurub.

Çempionat 2 həftə sonra Pol Rikarda davam edəcək. Fransa yarışı bizi gözləyən ardıcıl 3 yarışın ilkidir…

* Verilən Stop&Go cəzasını ödəmədiyi üçün onun ekvivalenti olaraq, nəticəsinə 30 saniyə əlavə edilib.

Sürətli dövrə: Maks Ferstappen (Red Bull) – 1:44.481 (44-cü dövrə, 206.839 km/s)

MÜBARİZƏNİ DAYANDIRANLAR:

SÜRÜCÜLƏRİN ÇEMPİONATI:

Yer	N	Sürücü	Ölkə	Komanda	Xal
1	33	Maks Ferstappen		Red Bull Racing	105
2	44	Lyuis Həmilton		Mercedes-AMG Petronas F1 Team	101
3	11	Serxio Peres		Red Bull Racing	69
4	4	Lando Norris		McLaren F1 Team	66
5	16	Şarl Lekler		Scuderia Ferrari Mission Winnow	52
6	77	Valtteri Bottas		Mercedes-AMG Petronas F1 Team	47
7	55	Karlos Sayns		Scuderia Ferrari Mission Winnow	42
8	10	Pyer Qasli		Scuderia AlphaTauri Honda	31
9	5	Sebastyan Fettel		Aston Martin Cognizant F1 Team	28
10	3	Daniel Rikkardo		McLaren F1 Team	26
11	14	Fernando Alonso		Alpine F1 Team	13
12	31	Esteban Okon		Alpine F1 Team	12
13	18	Ləns Stroll		Aston Martin Cognizant F1 Team	9
14	22	Yuki Tsunoda		Scuderia AlphaTauri Honda	8
15	7	Kimi Rəykkönen		Alfa Romeo Racing ORLEN	1
16	99	Antonio Covinatsi		Alfa Romeo Racing ORLEN	1

MÜHƏNDİSLƏR KUBOKU: