ABŞ-2017: Sıralanma turu

Sıralanma turu hava şəraitinin müdaxiləsi olmazsa, qaydalara əsasən,şənbə günü keçirilən məşqlərin başa çatmasından iki saat sonra start götürür. Bu ənənəyə həmişə əməl etməyə çalışırlar. Üstəlik, dünyanın bir çox kanalı sıralanma turunu canlı yayımlayır və onlar efir vaxtını əvvəldən planlaşdırırlar.

Bu ilin əvvəlində FİA yarış həftəsonlarının qrafikini dərc etmişdi və həmin qrafikə əsasən, Ostindəki təsnifat mərhələsi adət etdiyimiz vaxtda başlamalı idi. Lakin iyun ayında Liberty Media qərara almışdı ki, Castin Timberleykin konserti əvvələ salınsın. Berni Ekklstounun dövründə isə belə şeylər heç vaxt ola bilməzdi…

Həmilton Texasa çempionatın lideri kimi gəlib və bütün məşq sessiyalarında protokollara başçılıq edib. Onun əsas rəqibi Fettel üçün cümə günü problemsiz ötüşməyib – komanda məcbur olub ki, alman sürücünü ehtiyat şassiyə keçirsin.

Güc qurğusunun elementləri dəyişdirildiyi üçün dörd sürücünün – Brendon Hartli 25, Niko Hülkenberq 20, Maks Ferstappen 15 və Stoffel Vandornun isə 5 yer itirəcəyi məlum idi.

Pirelli Ostinə yumşaq üçlüyü – Soft, SuperSoft və UltraSoft tərkiblərini gətirib. Sürücülər məşqlərdə ən yumşaq tərkibə daha çox üstünlük veriblər.

İlk sessiyada Mercedes və Ferrari sürücüləri SuperSoft, qalan sürücülər isə UltraSoft təkərlərlə birinci cəhdlərinə çıxıblar. Boksu ilk tərk edən sürücü Kvyat olub. Külək güclənib və trasda sıxlıq olduğundan, yaxşı nəticə göstərmək üçün müəyyən boşluq tapmaq çox vacib olub. Strolla toqquşan Qrojan trasdan çıxıb. Maqnussen sürətli dövrəsində olan Peresə mane olub və bu hadisə stüardlar tərəfindən araşdırılır. İlk cəhddə Bottas hamıdan sürətli olub, lakin sonra Həmilton onu üstələyib – 1:34.822. Eriksson, Stroll, Hartli, Verlyayn və Maqnussen mübarizəni dayandırıblar.

İkinci sessiyaya startda yer itirəcəyi məlum olan Ferstappen SuperSoft təkərlərlə başlayıb. Cəriməsi olan Hülkenberqi isə komanda ümumiyyətlə trasa buraxmayıb və alman sürücü mövsümdə ilk dəfə sıralanma turunda komanda yoldaşına məğlub olub. Həmilton trasın yeni rekordunu müəyyən edərək protokollara başçılıq edib – 1:33.437. Üçüncü sessiyaya keçə bilməyən sürücülər Massa, Kvyat, Vandorn, Qrojan və Hülkenberq olublar.

Son sessiyada hamı UltraSoft təkərlərlə trasa yollanıb. İlk cəhddə Həmilton komanda yoldaşını yarım saniyəyə yaxın fərqlə qabaqlayıb. Son cəhdində Fettel Bottası qabaqlayıb və ikinci yerə yüksəlib. Rikkardo və Rəykkönen eyni nəticəni göstərsələr də, avstraliyalı sürücü bunu daha əvvəl etdiyi üçün protokolda Kimidən yuxarıda olub.

Lyuis Həmilton mövsümdə 11-ci, karyerasında 72-ci poulunu qazanıb. Yarışa onun yanından çempionatdakı əsas rəqibi Sebastyan Fettel başlayacaq və bizi startda maraqlı duel gözləyir. İkinci cərgədə Bottas və Rikkardo qərarlaşıblar.

Yarış sabah Bakı vaxtı ilə 23:00-da start götürəcək…

Yer	N	Sürücü	Komanda	1-ci sessiya			2-ci sessiya			3-cü sessiya
Yer	N	Sürücü	Komanda	Yer	Zaman	Dövrə	Yer	Zaman	Dövrə	Zaman	Dövrə
1	44	Lyuis Həmilton	Mercedes AMG	1	1:34.822	5	1	1:33.437	6	1:33.108	7
2	5	Sebastyan Fettel	Ferrari	4	1:35.420	5	4	1:34.103	6	1:33.347	7
3	77	Valtteri Bottas	Mercedes AMG	3	1:35.309	4	2	1:33.769	6	1:33.568	7
4	3	Daniel Rikkardo	Red Bull	11	1:35.991	5	5	1:34.495	3	1:33.577	6
5	7	Kimi Rəykkönen	Ferrari	7	1:35.649	5	3	1:33.840	6	1:33.577	6
6	33	Maks Ferstappen	Red Bull	2	1:34.899	4	6	1:34.716	3	1:33.658	6
7	31	Esteban Okon	Force İndia	10	1:35.849	5	10	1:35.113	6	1:34.647	6
8	55	Karlos Sayns	Renault	5	1:35.517	8	8	1:34.899	6	1:34.852	3
9	14	Fernando Alonso	McLaren	8	1:35.712	3	9	1:35.046	6	1:35.007	6
10	11	Serxio Peres	Force İndia	14	1:36.358	7	7	1:34.789	6	1:35.148	6
11	19	Felipe Massa	Williams	6	1:35.603	3	11	1:35.155	6
12	26	Daniil Kvyat	Toro Rosso	12	1:36.073	9	12	1:35.529	6
13	2	Stoffel Vandorn	McLaren	13	1:36.286	8	13	1:35.641	6
14	8	Roman Qrojan	Haas	15	1:36.835	8	14	1:35.870	6
15	27	Niko Hülkenberq	Renault	9	1:35.740	3	15	–	0
16	9	Markus Eriksson	Sauber	16	1:36.842	9
17	18	Ləns Stroll	Williams	17	1:36.868	8
18	39	Brendon Hartli	Toro Rosso	18	1:36.889	7
19	94	Paskal Verlyayn	Sauber	19	1:37.179	9
20	20	Kevin Maqnussen	Haas	20	1:37.394	7